Constancia C. Ybanez
Gun-ob, Lapu-Lapu City, Cebu
GIKUSO-KUSO kalantap sa kalawran,
Naligsan ayaayng pangandoy
Gagmayng alon nga nag-amuma
Paghapuhap sa malinawong
Kahimtang sa dagat.
Gihiyak kabalaka tiyan sa pobreng
Mananagat, gipahilak paglaom
Sa pobreng manginginhas.
Nagkatibulaag ang mga isda,
Nabungkag ang hunasan, nahibat
Ang katahom sa baybayon!
O, pila kaha ka higanteng balod
Sa tawhanong laraw ang nagtinguha
Pagkab-ot sa gahom ug bahandi
Nga miguba sa dunggoanan
Sa nasudnong kaangayan?
Pila kaha natong mga gagmayng alon
Nga yanong mangapaykapay
Sa dagat sa pagpakabuhi ang gibanlas
Sa abuso sa mga higanteng balod
Sa kahakog?
Apan, ah! Samtang nagtuyok pa
Ang ligid sa adlaw may kahayag pa
Nga moaway sa gahom sa kangitngit,
May huyuhoy pang motapdas
Sa kalikupan sa paghiamgo nga
Magsabulak og alimyon sa gugma
Pagpuypoy sa bul-og sa mapahitas-on
Nga mga balod sa tawhanong pagbati!