SA gipanglantawan nang daan ang kahasol sa baha dala sa subsub nga ulan nagoasuwabe sa nakalabay nga mga adlaw. Di matabang ang epekto niini sa atong inadlaw nga gimbuhaton.
Usahay mahurot nalang ang imong oras sa paglim-as sa nabara nga tubig sa imong palibot. Luoy kadtong nagpuyo sa mga dapit nga kanunayng bahaan kay bisan nibalik na ang kainit sa panahon nagpabilin pa gihapon ang nag-luoy nga tubig.
Way hubas hubas kay maabtan naman sab sa laing pagbunok sa ulan. Gawas sa ting-init ug ting-ulan dinhi sa Pilipinas, tulo na ang atong lakat sa panahon kon iapil nimo ang baha. Gamay nga bunok sa ulan mobaha dayon. Sa salida sa sine og telebisyon makita nato nga sanapan sab sa tubig ang kadalanan sa mga modernong dakbayan sa kalibutan kong dunay kusog nga ulan. Ang naka nindot sa ilaha didto kay unyag lurang inanay sab nga mawala ang baha.
Di lang inoras senimana pa usa mawala ang maong problema. Sa niaging kampanya sa eleksiyon sa barangay, daghang plataporma ang giladlad pagsulbad ning maong problema. Karon nga nidaug na ang mga tag-iya sa plataporma, manghinaot ta nga tumanon nila ang ilang gipangsaad.
Katungod sab nato ang pagpaningil bisan kadtong wa makabotar o nibotar sa maong mga kandidato nga nanaug. Di man mahimo nga sa usa ka sitio nga gibahaan kadto ra nibotar nimo ang lim-asan sa tubig o palambuon ang drainage system. Makadaghan nata makadungog nianang kanunay nilang ipasigarbo nga master plan para sa drainage system.
Naa lagi plan apan matawag sab nato nga master ra pud sila sa saad. Aksiyon ug di lang kutob sa plano ang atong gikinahanglan Adtoa sa ilang balay ning ubang nagpasiatab ning maong proyekto. Wa gani sila kapanglimpiyo sa ilang kaugalingong kanal unya maayo kaayong mohisgut og solusyon atubangan sa daghang tawo.
Masangpit
Usahay maghangad ta og tabang gikan sa munisipyo o city hall panahon sa emerhensiya. Ang atong gikinahanglangtabang naa ra diay sa atong silingan o sitio. Mao ni gusto natong pasiugdahan sa ubang barangay nga wa pa makahimo niini bisan ka usa. Tawgon nato ni nga Oplan Pagpakabana. Ubos sa oplan ang barangay mopasiugda og profiling o pag-ilaila sa mga propesyonal sa ilang dapit. Pananglit nurse.
Manglista sila pila ka buok nurse ang nagpuyo sa usa ja sitio. Kuhaon ang contact number ug schedule sa trabaho. Unya hangyoon nga sa panahon sa emerhensiya unya wa silay duty mahimo ba nga masampit.
Gawas sa mga nurse ug ubang propesyonal nga suheto sa medikal nga panginahanglan iapil sab sa listahan kadtong mga operator og heavy equipment, ug bisan kinsa nga makatabang panahon sa emergency. Iapil sab paglista ang mga lumolupyo nga dunay mga gamit nga mahimong mahulaman kon gikinahanglan. Sa ingon niini nga paagi mas paspas ang pagtubag sa kalit kalit nga panginahanglan.