HUGOT ang hukom ni Deputy Speaker Gwen Garcia nga mobalik pagdagan og gobernador. Nakaaghat kadtong kamandoan ni Ombudsman Conchita Carpio-Morales pagtangtang sa serbisyo gumikan sa pag-abuno sa Balili property nga giingong walay pagtugot sa hunta probinsyal. Apan wala mapatuman ang maong hukom. Sila si Gov. Junjun Davide ug Vice Gov. Agnes Magpale ang misang-at sa kaso.
Panahon ni Gwen number one premiere province ang Sugbo sumala sa National Competitiveness Council of the Phil. Apan sa panahon ni Davide natagak sa ika-tulo sa 2014, ika-35 sa 2015 ug ika-45 sa 2016. Running mate ni Gwen mitumaw ang mga ngalan nila ni Reps. Red Durano ug Benhur Salimbangon. Si Salimbangon ning sayo pa mibalibad kay tabangan ang iyang kapikas nga si Janice nga modagan puli kaniya aron paghingpit sa iyang nasugdang laraw nga economic zone sa ika-upat nga distrito.
Usab dunay kusganong awhag nga padaganon og balik pagka gobernador si Atty. Winston Garcia diin pabor karon kay ang One Cebu nagpasilong man sa PDP-Laban. Apan kon modayon si Gwen gisabotan sa pamilya ug sa grupo nga si Winston padaganon og kongresista sa ika-pito samtang si kanhi kongresista Pablo John Garcia mobalik sa ika-tulo nga distrito.
Sa LP gihugon-hugon nga lain ang mopares ni Gov. Davide kon lain nga posisyon ang daganan ni Vice Gov. Magpale. Diha kadtoy higayon nga miaslom ang relasyon tali nila ni Davide ug Magpale gumikan sa mga anomalosong transaksyon sa mga tawo sa gobernador.
Laing kisaw nga si Rep. Samsam Gullas maoy padaganon og mayor sa Talisay samtang ang apohan nga si Mayor Eduardo Gullas mobalik pagka-kongresista sa unang distrito. Apan gilantaw sa Alayon-LP nga kon mohinay si Gullas gumikan sa isyo sa katigulangon ang ilang grupo mopadagan ni kanhi Naga Mayor Val Chiong pagka-kongresista.
Sa ikaduhang distrito dunay awhag nga padaganon si Board Member Edsel Galeos nga moatbang ni Rep. Willy Caminero sa LP. Sa ikatulong distrito posibling mobalik si kanhi Board Member Gigi Sanchez atbang sa mga Garcia. Sa ika-upat nga distrito si Bogo Mayor Carlo Martinez ug Janice Salimbangon maoy magparang.
Sa ikalimang distrito wala pay mitumaw nga moatbang sa mga Durano sa habig ni Danao Mayor Nito Durano. Sa ikaunom nga distrito walay pay nangahas pagpahibalo nga moatbang ni Rep. Jonas Cortes.
Hinoon gikataho nga si Cortes mobalik pagdagan og mayor sa Mandaue human matandog ang poltikanhong relasyon nila ni Mayor Luigi Quisumbing. Hilom pang banayng Ouano. Sa ikapitong distrito usa sa mga Garcia moparang ni Rep. Peter Calderon. Sa lone district sa Lapu-lapu hilom pa kinsay mokontra ni Rep. Aileen Radaza.
(csa_1156@yahoo.com/0916-734-5737)