GIDUAW ni Philippine National Police (PNP) Director General Oscar Albayalde ang usa ka pulis nga sakop sa Sta. Ana Police Station kinsa napusilan sa suspek nga ilang gi-drug bust, alas 7:50 sa gabii niadtong Huwebes.
Gihatagan og pasidungog si Police Officer (PO) 3 Alvar Masher Basirul kinsa anaa sa Southern Philippines Medical Center (SPMC) human maigo ang walang bukton niini dihang gipusil sa target sa ilang operasyon.
Ang napatay nga suspek mao si Johnny Alberio Acogido, 40, nagpuyo sa 75-5 De Junio Street, Sun Valley NAIA, Pasay City apan midayo kini aron mamaligya og shabu sa Isla Verde, Brgy. 23-C, Quezon Boulevard, Davao City.
Giingong nakig-text ang suspek sa operatiba sa Sta. Ana Police Station aron mobaligya og usa ka pakite sa gituohang shabu, diin dihang arestuhon na siya kay positibong niyang gidunol ang usa ka pakite.
Nasayran nga nagmagahi ang suspek sa pagtahan kalit kining mibunlot og armas dayon gipusil ang operatiba ug naigo kang PO3 Basirul tumong sa walang bukton hinungdan nga giniyutralisa ang suspek.
Nadala pa sa ospital ang suspek apan gideklara kining dead on arrival.
Bisan pa man sa hitabo, mapasalamaton gihapon si Albayalde sa kakugi nga gipakita sa kapulisan luyo sa mga makuyaw nga kahimtang sa ilang trabaho.