SUMPAYAN og suway sa defending champions San Miguel Beermen ang ilang sunodsunod nga kadaugan sa ilang pagpakigbatok sa NLEX Road Warriors sa Petron Blaze Saturday Special sa Philippine Basketball Association (PBA) Commissioner’s Cup sa Calasiao Sports Complex sa Calasiao, Pangasinan.
Human sila nasubhan og upat ka sunodsunod nga kapildihan, ang Beermen mingbawi ug mireshistro sab kini’g upat ka sunodsunod nga kadaugan.
Dala ang 4-4 nga rekord, ang defending champions nahiluna na sa ikalima samtang ang Road Warriors, nga adunay 2-7 nga rekord, wala na’y poruhan nga makasulod sa playoffs.
Kon buot hunahunaon, kini nga kombati magsilbe na lang usa ka hugot nga preparasyon sa Road Warriors alang sa sunod komperensya nga mao ang Governor's Cup.
Sayod si Beermen coach Leo Austria nga dili sila angayang molugak ning sangkaa hilabi na kay wala’y bisan gamay nga pressure ang Road Warriors.
Hinuon bisag unsaon og balibali, dako gyud og bintaha ang Beermen ning kombatiha gumikan kay kuwangan og tawo ang Road Warriors.
Daan nang nawala sa Road Warriors ang ilang pambatong pointguards nga sila si Kevin Alas ug Kiefer Ravena unya nadugang pa si Larry Fonacier.
Si Fonacier adunay angol sa iyang gusok.
Unya sa ilang bahin, gilaumang mobalik na og duwa sa Beermen si Fil-German Christian Standhardinger.
Ang Beermen nagkinahanglang modaog sa katapusan nilang tulo ka mga tahas aron makakompayot pa sa sa inilugay sa top 2 spots.
Ang mopatigbabaw nga duha human sa elimination round makaangkon og twice-to-beat nga bintaha sa nagkaduol nga quarter-finals. (ESL)