HUMAN sa kamatayon sa labing minos tulo ka mga pari sa ubang mga dapit sa Pilipinas ning bag-ohay lang, nitumaw ang mga impormasyon nga dunay mga pari nga gustong mohupot og mga armas. Dinhi sa Sugbo, gikataho nga dunay pito ka mga pari nga lisensyado sa paghupot og armas.
Makapakurat kini ug di naandan nga talan-awon alang sa mga tawo nga nangalagad sa simbahan.
Di kini naandan tungod kay ang mga alagad sa simbahan naila man nga nagsakripisyo sa ilang pagsunod ni Hesukristo.
Gani, dihang gidakop si Hesukristo aron taralon tungod sa giingong mga kalapasan, si San Pedro nilanit og espada dayon gitigbas niya ang usa sa mga nagdakop.
Gibadlong siya ni Hesukrito kay ang "nabuhi pinaagi sa espada, mamatay usab pinaagi sa espada." Giuli ni Hesukristo ang bahin sa lawas nga naigo.
Ang mga martir sa simbahan nangamatay sa ilang pagsangyaw sa pagtuo nga wa mogamit og bisan unsa nga hinagiban, makasamad man o makamatay.
Ilang gigakos ang kamatayon tungod ug alang sa ilang gugma sa Diyos. Wa sila mangahadlok sa kamatayon tungod kay sila nagtuo nga naghuwat kanila ang gingharian sa Ginuo.
Unta, ingon niini ang pagtuo sa ubang kaparian nga nakahukom nga igugol ang ilang tibuok kinabuhi sa pagpangalagad sa Ginuo ug sa iyang katawhan.
Di angay nga mokupot og armas ang si bisan kinsa nga pari, bisan unsa man ang ilang katuyoan. Kay kon naa na ang armas sa kamot sa tawo, moabot ang higayon nga siya mapugos sa paggamit niini kon iyang makita nga gikinahanglan. Kay kining armas di kini duwaan. Gigama kini aron pag-angol o pagpatay kon moabot ang panginahanglan sa kahigayunan.
Unta, panaminan ug huna-hunaon og maayo sa kaparian ang paghupot og hinagiban, inay lunlon Bibliya.