NANAYGON napatay human gidakop sa kilat ang kwerdas sa iyang gitara atol sa pagbunok sa uwan niadtong Huwebes sa alas 2:00 sa hapon sa bukirang Barangay Generala Climaco, dakbayan sa Toledo.
Si Fil Abenoja Gelig, 19, taga Sitio All Season, Brgy. Cogon Pardo, dakbayan sa Sugbo, patay na dihang nadangat sa tambalanan sa Toledo human sa grabing kadaot sa iyang lawas.
Si SPO2 Marciano Suarez, imbestigador sa Toledo Police, nagkanayon nga nasunog ang tibuok lawas ni Gelig kinsa nga nag-inusarang nanaygon samtang dag-om ug nagtaligsik.
Apan naabtan kini sa kusog nga pagbundak sa ulan, kusog nga kilat ug pagdugdog. Nipasilong si Gelig sa dakong punoan sa kahoy apan naigo gihapon kini sa kilat.
Ang lawas sa biktima na-claim sa alas 8:00 sa gabii niadtong Huwebes iyang paryente nga si Junriel Laoglaog nga maoy nikuha sa patay uban sa usa ka punerarya. (GPL)