GISUSPENSO sa Office of the Ombudsman-Visayas ang lima ka mga opisyal sa Cebu Port Authority (CPA) samtang, nakalingkawas ang laing tulo gumikan sa anomalusong pagpalit og tulo ka big bikes niadtong tuig 2007.
Si Cynthia Maturan-Sibi, graft investigation and prosecution officer, nihukom nga guilty sa kasong administratiba ug gipahamtangan og silot nga usa ka tuig nga pagkasuspenso sa ilang trabaho nga walay suweldo.
Gihukmang sad-an mao silang Mario Tan, Oscar Lopez, Yusop Uckung, Ninfa Hernandez ug Elizabeth Suarez.
Gumikan sa lack of jurisdiction, gipakaway sala silang kanhi general manager (karon nabalik) Angelo Verdan, Dennis Villamor ug Owen Dominic Roma.
Ang maong kaso nagagikan sa pagpalit sa CPA og tulo ka dagko nga motorsiklo niadtong 2006 sa Drei Bikes Trading balor og P465,000 nga wala gipaagi sa public bidding sa CPA nga nasubay sa balaod ang ilang gihimo nga shopping inay sa public bidding sanglit ang kantidad sa matag motorsiklo wala makaabot og P250,000 subay sa section 52 sa RA 9184.
Apan matod pa sa Ombudsman nga nagbalor og P465,000 ang usa ka transaksyon ug dili P165,000 (nga maoy kantidad sa usa ka big bike) sanglit usa ra hugna ang pagpalit sa maong ekipo.
“Having exceeded the threshold amount of P250,000 for a single transaction, the BAC gravely erred in recommending the resort to shopping instead of public bidding” tipik sa hukom sa Ombudsman.
Gawas niini, atol sa inspection sa motorsiklo nga gi-deliver, nasuta nga secondhand ug dili brand new ang tulo ka motorsiklo diin ang wiring sa blinker wa matarong, gitaya ang accessories, ang makita adunay leaking sa oil, ug ang duha ka motor deperensiyado ang makina.
Niadtong March 2007, si Carmelita Tormis, audit team leader sa COA niingon nga irregular ang pagpalit sa motorsiklo ug gi-disallow ang transaksyon.
Ang P465,000 nakuha og balik sa CPA gikan sa Drei Bikes Trading ug Cost of Living Allowance ni Roma kinsa maoy canvasser ug niluwat nba sa katungdanan. (AZDL)