BALA migawas sa baba sa sakop sa City of Lapu-Lapu Allied Force (CLAF) human gipusil sa riding-in-tandem sa miaging gabii sa Barangay Buaya, Lapu-Lapu City.
Ang CLAF usa ka force multiplier sa matag barangay sa Lapu-Lapu City nga moabag sa kapulisan sa pagpatunhay sa peace and order ingon man sa pag-assist sa traffic enforcer nga modumala sa trapiko sa kadalanan.
Patay diha-diha si Armold Pino, 43, minyo, taga-Zone 1, Carmelite, Barangay Buaya sa dihang giulo sa pagpusil ug ang bala nilapos sa iyang baba.
Sa pasiunang imbestigasyon ni SP03 Allan Pantaleon, Homicide investigator, si Pino kinsa nag-sideline isip ‘habal-habal’ drayber, naglingkod-lingkod sa may poste sa traffic light sa eskena sa Aviation Road ug M.L. Quezon highway mga alas 7:30 sa gabii niadtong Huwebes.
Si Pino nagtupad sa iyang motorsiklo ingon sa nagpaabot og pasahero sa dihang miabot ang duha ka wa pa mailhing mga lalake nga luwan sa motorsiklo.
Saysay ni Pantaleon nga ang backrider nipagawas sa iyang armas dayong pusil kang Pino.
Human sa pagpusil, nisutoy kini sa pagpadagan lahos ngadto Barangay Mactan human naigo niini ang ilang target.
Ang Homicide investigator padayon sa ilang background check sa biktima ingon man ang pag-ila sa duha ka mga mamumuno. Dugang pa ni Pataleon nga ila sab nga gisuta ang motibo. (FVQ)