UBAY-UBAY ka mga armas ang nasakmit gikan sa usa ka barangay kapitan ug kagawad dihang ang kapolisan nagpahigayon og search warrant sa barangay Duminorog, Talakag, Bukidnon.
Nadakpan mao si Joel Valendez, 69, barangay kapitan, Benoni Valendez, 35, barangay kagawad ug iyang kauban nga si Aldine Jay Valendez, 34.
Si Joel giingong lider sa Valendez Criminal Gang/Armed Group (DI Unlisted) nga maoy responsable sa gun for hire ug pagpangilkil. Lakip na niini Si Benoni ug Aldine Jay.
Nakuha sa ilang posisyon ang tulo ka units sa 12GA shotgun, 1 unit sa kalibre 40 Glock pistol; usa ka fragmentary delay M61 grenade; tulo ka steel magazines sa kalibre 40; 29 ka mga buhing bala sa kalibre 40; 36 ka 12GA shotgun live cartridges; tulo ka outside holsters; 1 ka inside holster sa kalibre 45; ug ka bandolier para sa M16; ug usa ka kolor itom nga pouch.
Samtang nasakmit sab gikan kang Ardine Jay mao ang usa ka unit sa 12GA shotgun; usa ka fragmentation hand grenade; 3 ka cellophane sa gitouhang uga nga marijuana ug uban pa.
Nakuha gikan kang Benoni mao ang usa ka unit sa improvised shotgun; 16 ka mga buhing bala sa shotgun; usa ka M1 garand rifle uban sa 3 ka buhing bala niini ug laing M203 grenade.
Ang mga dinakpan gibalhog na karon sa prisuhan sa Talakag Municipal Police Station.
Si Police Regional Office 10 Regional Director PC/Supt. Timoteo Pacleb nipaabot sa iyang pagdayeg sa kalampusan sa pwersa sa kapolisan nga milusob sa operasyon.
"This is to show our strong commitment with PRRD in the marching order of our CPNP in Getting Rid-Off of Criminal Elements involved in illegal drugs and other illegal activities" butyag ni Pacleb.
Gipasalamatan sab niini ang komunidad nga nakigtambayayong sa paghatag suporta sa mga personahe pinaagi sa paghatag inpormasyon sa nagkalain-laing gidiling kalihokan sa ilang tagsa tagsa ka lugar.