PATAY ang usa ka lalaki human nga nabangga ang gimaneho nga sakyanan sa nakaparada nga crane kagahapon ala 1:30 sa kaadlawon, June 22, diha sa National Highway, Barangay Gusa, dakbayan sa Cagayan de Oro.
Naila ang namatay nga mao si Ifour Manduro, 51, minyo ug residente sa Purok 2, Villa Flora Subdivision, Cugman ning dakbayan ug giingong usa ka coach.
Sa nahipos nga inpormasyon gikan sa kapolisan sa Police Station 3 (PS3) sa Agora gikabutyag nga samtang gibaybay sa biktima ang kadalanan sakay sa Mitsubishi Strada pick-up nga kolor puti, nga nay plaka KFT-818 diha sa may inner lane paingon sa Butuan City aksidente kining nabangga.
Pag-abot sa maong dapit maayong pagkabangga niini sa likoran nga bahin sa sakyanan nga adunay crane nga nakaparada lamang sa maong dalan sa tulo na ka adlaw.
Ang maong truck gipanag-iyahan sa Makati Development Corporation (MDC) ug wala na kini nag-function sulod sa tulo ka mga adlaw base sa saysay nila ni Ramjay Patcho ug Jimmy Basirgo, mga trabahante sa Asiapro ug mao usab ang nagsilbing gabantay sa maong sakyanan.
Dali pa nga gidala sa Capitol University ang biktima apan nakabsan na kini og kinabuhi.