SIMPLE ra man kining pagpangita og alternatibong ruta alang sa Ironman 70.3. Kaanindot ra nga ruta nga moagi sa taytayan sa Cansaga ngadto padung sa amihanang bahin sa Metro Cebu.
Nakasiguro ko nga gusto makakita ang mga taga amihanang dapit sa Metro Cebu sa lumba labi na nga daghan ang mga celebrity ang mosalmot.
Mao kini ang nisantop sa akong hunahuna dihang nitumaw ang isyu nganong di mosugot si Mayor Tomas Osmeña nga anha sa South Coastal Road ug sa SRP moagi ang Ironman 70.3 karong Agusto 5.
Sa miaging katuigan, anha man gud moagi sa South Coastal Road sa Syudad sa Sugbo padulong sa Syudad sa Talisay kining maong lumba.
Di lalim kining Ironman oi. Isip triathlon, ang mga atleta modagan og 21 kilometro, molangoy og 1.9 kilometro, dayon magbisekletag 90 kilometro.
Nasiguro ko naay daghang mga bag-ong fans unya sa maong lumba ang manan-aw. Dayon ang mga taga Syudad sa Sugbo ug Talisay maghinamhinam sa sunod tuig.
Ang nakaapan lang kay gihimo man sab gud dayon nga isyu sa politika.
Gisakyan pag-maayo ang kahuot sa trapiko bunga sa underpass nga gibuhat diha sa Mambaling. Dayon gibuhat pa kini nga rason batok sa pagtukod sa Bus Rapid Transit (BRT).
Sa kahanggaw sa OPAV, gipasanginlan pa ang Syudad sa Sugbo niining trapiko sa South Coastal Road bunga sa kakulang sa pagdumala sa trapiko diha sa eskina Laray tungod sa Gaisano.
Kon duna may masuko niining walay Ironman sa Syudad sa Sugbo karong Agusto, mas maayong basulon kining nagpataka lang og sakay og isyu sa trapiko aron dunay kintahay rason sa pagbatok sa BRT.
Gikapoy
Ambot nganong dugay nakasabot si kanhi mayor Mike Rama nga iyang kauban lang sa partido ang dakong babag sa iyang paglansar alang sa pagka mayor karong 2019.
Bisan pa man, nakakita ko sa video sa iyang pakigpulong atubangan sa iyang mga tigsuporta sa miaging Hunyo 12 diin iyang gibalikbalik pag-ingon nga gikapoy na siya.
Gikapoy na sa mga kalaki sa iyang mga kauban. Human niya gianunsyo isip lider sa Barug Team Rama nga siya ang kandidato alang sa pagka mayor karong 2019, duna pa gyuy moingon nga sabutan pa nila sa partido.
Bitaw mayor, ngano gyud intawon nga ikaw ang nagtanom ug nag-amuma unya lain ang mo-ani?
Lain lang sab ang akong pangutana, kinsa man gyud ang lig-on nga kandidato? Si Rama o Bise Mayor Edgar Labella?
Nakapangutana ko kay wa baya makapadaog si Labella sa iyang igsuon nga nidagan diha sa Mabolo. Ang nakadaog mao si Kap Niña Mabatid nga kandidata alang sa pagka ABC president sa PDP-Laban.
Nakapangutana sab ko kon si kinsa man gyud diay ang matuman diha sa PDP-Laban sa Syudad sa Sugbo? Si Labella o kining naa sa Greenery?
(@anol_cebu sa Twitter)