DUNA na sab karoy tinguha nga I-drug test ang mga tinun-an ug magtutudlo aron masayran kinsa ang mga drug user.
Di unta dautan ang pagsusi kon kinsa ang drug user, apan kon ang mga bata nga bisan nag-edad pa og 7 anyos ipailawom sa drug test, lahi na kini. Di ba ni traumatic sa usa ka bata nga ipailawom sa usa ka procedure nga di gani niya masabtan kon alang sa unsa?
Matod sa Philippine Drug Enforcement Agency (PDEA) nga duna nay mga hitabo diin bisan ang 7 anyos drug user na. Apan igo na ba kining basehan sa mga awtoridad nga bisan ang linghod pa kaayog edad nga mga bata ipailawom niining mao nga procedure?
Ang pipila ka isolated nga mga hitabo di angay nga maoy himuong basehan sa pagpahigayon sa lapad nga drug tests nga maglakip sa mga bata.
Duna say balaud nga nanalipod sa katungod sa mga bata, diin ang bisan unsa nga buhat nga magbutang kanila sa kauwaw usa ka kalapasan. Kining mandatory drug testing mahisama sa giisip nga ang tanang mga bata drug users na, di ba?
Mas maayo nga ang pagpailawom sa kabataan sa drug testing case to case basis lang. Kanang magdepende sa sitwasyon sa usa ka bata, kana kon ang tunghaan diin siya mag-eskwela, nagduda nga siya drug user, uban sa pagtugot sa mga ginikanan.
Di usab kini maayo nga imahen ngadto sa international community. Gawas nga hayan tan-awon kini nga kalapasan sa batakang katungod sa kabataan, magpintal usab kini og imahe sa Pilipinas nga dunay dakong problema sa drugas, nga bisan ang kabataan ilakip na sa mandatory drug test.
Hinaut pa nga huna-hunaon una sa mga awtoridad ang linugdangan ning mao nga lakang sa di pa kini nila ipatuman. Mosanta ba kini sa suliran sa drugas diha sa mga tunghaan?