Florencio Pacaldo Inoc
Intramuros, Cordova, Cebu
KAGUOl ug kabalaka ang gibati karon ni Potenciano. Hapit na moabot ang gitagal nga adlaw sa ilang kasabutan ni Emelio nga kon dili niya malukat ang iyang giprenda nga yuta sulod sa lima ka tuig, hingpit na kining mapanag-iya ni Emelio.
Gianugnan siya sa luna kay ang mga tanom niini naglakip sa mga punoan sa bungahoy ug prutas ug mga lainlaing klase sa mga utanon. Mao kiniy nakahatag og kaharuhay sa ilang kinabuhi. Apan karon kon dili niya kini malukat, si Emelio na unya ang hingpit nga makapahimulos niini.
Gianugnan sab siya niini kay ang maong luna kabahin man sa mga butang nga iyang ikabilin sa iyang bugtong nga anak nga si George. Gusto niya nga kon aduna na kiniy pamilya may luna na kini nga kakuhaan sa ilang panginabuhian. Apan karon hanap na kini nga mapanunod pa ni George. Wala na siyay salapi nga ikalukat sa maong luna. Napugos siya sa pagprenda sa maong luna dihang na-ospital ang iyang asawa nga si Trinidad. Nahurot ang tanan nilang tinigom, mao nga napugos siya pagprenda sa luna ngadto kang Emelio. Singkuwenta mil pesos ang ilang pag-prenda niini.
“Pa, ayaw’g kabalaka nga dili na nato malukat ang maong yuta,” ni George nga nagpahiyom ug miagbay sa abaga sa iyang amahan.
“Ngano god tawon nga di ko maguol ug mabalaka, George? Bililhon kaayo ‘na nako ang maong luna, kay gawas nga nakahatag na nato og kaharuhay sa atong kinabuhi, kabilin sab na nako gikan sa imong apuhan. Gusto sab nako nga ibilin kini kanimo kon wala na mi si mama nimo Trinidad,” ni Potenciano nga miatubang kang George. Apan igo lang mipahiyom si George. Ingon nga wa gyud kini mabalaka kon unsay mahitabo sa luna nga ilang naprenda kang Emelio.
PAGLABAY sa pipila ka bulan masuk-anong miadto si Emelio sa balay nilang Potenciano.
“Potenciano, hain ang anak mong si George?” Singaak ni Emelio dihang nag-atubangay na silang duha sa sala sa balay ni Potenciano.
“Ngano man nga nangita ka kaniya, Emelio?” ni Potenciano. “Wa ra ba siya diri kay misuroy kuyog sa iyang mga amigo.”
“Ah! Kinahanglan nga karon gyung gabii mangadto mo sa among balay aron tubagon niya ang nahitabo sa bugtong namong anak nga si Diana! Tulo na diay ka bulan nga nagsabak si Diana ug si George mao ang amahan sa iyang gisabak!”
Human sa ilang panihapon nangadto dayon sila si Potenciano ug si George sa balay nilang Emelio. Didto ilang gisabutan ang bulan ug ang petsa sa kasal nilang George ug Diana. Human sa maayong panagsabot gibati nila ang kalipay. Gidugangan nila ang ilang kalipay pinaagi sa pagtagay sa paborito nilang ilimnon, ang tuba, nga giparesan sa sumsuman nga adubong baboy ug inasal nga manok nga giandam nilang Emelio alang sa maong okasyon.
Samtang nagpadayon ang inom misantop sa hunahuna ni Potenciano nganong wala lang mabalaka si George kon dili malukat ang bililhon nilang luna nga naprenda ngadto kang Emelio. Nakapanglingo-lingo siya nga mahimut-on. (Katapusan)