KANIADTO dihang nagplano kong mopalit og mountain bike, naglisod ko sa pagpili kay ang matag tawo nga akong pangutan-on lainlain og opinyon. Naay biases nga nagdepende usab sa ilang discipline sa bike. Akong nadiskobrehan nga gusto sa usag usa nga ang ilang discipline maoy sundon.
Apan ako lahi. Kon akoy pangutan-on, mangutana ko kon unsay ganahan, kabukiran o karsada. Kon bukid, morekomendar ko sa mountain bike. Kon karsada ug lagyo nga biyahe, road bike. Kon city ride or commuting lang, naay folding bike nga mas haom.
Sa mountain bike, mangutana sab ko kon mag trail ba or mosaka lang agi sa mga karsada, paved or rough. Kay alang nako, dunay kalainan sa duha. Kon pareho nako nga kontento lang sa mga karsada nga paved or rough, maayo na ang hard tail. Sa trail, mas maayo ang suspension.
Di ko morekomendar sa usa ka klase sa frame tungod lang kay mao kini ang akong ganahan. In the end, di man ako ang mosakay, kon di ang tag-iya.
Busa, mas maayo nga sa di ka pa mopalit og biseklita, pag-research una sa internet. Naay Google ug Youtube nga imong magamit. Unya pangutana sa mga higala.
Bisan ang presyo matan-aw man sa internet. Lahi kaniadto nga medyo lisod ang pagsuta kon unsay maayo ug mas haom nga bike alang nimo.
Ayaw pakaliti
Sa pagsakay nako sa una nakong mountain bike, nanukad ko sa Sunstar padung sa among balay. Diin ko nipahuway? Sa Country Mall ko nihunong aron moginhawa. Nagtuo ko nga sayon ang biseklita ug ang pagtindak ini. Apan kon medyo dunay gilay-on ang imong tindakan, anha na diha maamguhan nimo ang kalisod.
Sagad, di ko modiretso og tungas og lagyo o kaha biyahe og lagyo. Sa bukid sa Barangay Guba ra ko or kon patag, sa Cordova ug Compostela ko kutob. Nahinumdom lang ko dihay usa ka Huwebes Santo, niadto ko og Danao City kay mokaon og tinap-anan. Pag-uli nako, nagsugod ang bikog sa may Barangay Basak. Di hinuon grabe kay nakaandam na ko daan.
But kining ingon niani nga sitwasyon, makaapekto baya sa biyahe. Mao nga di maayong pakalitan ang lawas.
Hinayhinay
Kon nagsugod ka pa o mao pay pagbalik, hinahayhinaya ang pag-adjust sa lawas. Ayaw pakaliti kay aron di kaayo sakit ang imong pamation. Kay usahay ra ba,malab-anan ang kasakit, maglisod ka og katulog.
Mag-alindasay ka kon sobra ra kasakit ang imong lawas. Maora kag gibuwagan sa imong uyab for five years. Maghinayhinay, di pakalitan aron di grabeng masakitan.