POSITIBO nga gilugos una gipatay ang usa ka 16-anyos nga junior high student sa Talomo District subay sa resulta sa otopsiya sa medico legal, basi sa Talomo Police Station Sabado.
Duha ka oras lamang gikan sa pagkakaplag sa patay’ng lawas ni Shiela (bansagon gitago), nasikop dayon ang suspek nga si James Barrete Narte, 35, trabahador, kinsa silingan ra sab sa biktima sa Purok 10, Libby Road, Brgy. Bago Gallera, Davao City, alas 12:10 sa tungang gabii, Sabado.
Nasikop ang suspek human sa manhunt operation nga gipahigayon sa Talomo Police Station ug positibo nga giila si Barrete nga maoy nanglugos basin usab sa testimonya sa mga testigo ug sa physical evidence nga makita sa suspek.
Alas 10 sa gabii Biyernes sa dihang napalgang nagbuy-od ug wala nay kinabuhi ang biktima.
Mismong ang igsuon sa biktima ang nakakita sa patay nga lawas sa iyang manghud nga gitabonan og blue nga selopin nga iputos og saging.
Nakita sa igsuon nga nahubo na ang panty ug pantalon sa biktima ug dunay daghang dugo nga migawas sa dalunggan ug ilong nga gituohang gihapak og bato hangtud namatay.
Sumala ni Chief Inspector Ronald Lao, hepe sa Talomo PNP, nga migawas na ang resulta sa otopsiya sa patay'ng lawas sa biktima ug nakita nga positibo kining gilugos una gipatay.
Alas 7 sa gabii sa maong adlaw, nilakaw ang biktima sa ilang balay aron magpa-load apan wa na kini kabalik hinundang gipangita sa igsuon ug didto nakit-an gawas sa usa ka abandonadong balay ang biktima.
Sa kasamtangan, padayon ang pagbangutan sa pamilya sa biktima samtang ang suspetsado nabalhog na sa selda sa Talomo PNP diin limitado lamang ang tubag niini sa pangutana sa mga pulis.
Kasong rape with homicide ang ipasaka nga kaso batok sa suspek. (Jeepy P. Compio)