MOTHER KABUNTALAN, Maguindanao Province -- Nahidangat sa tambalanan ang usa ka sundalo human kini gipahit og Cobra alas 6:30 sa gabii Biyernes, Hunyo 22.
Naila ang biktima nga si Corporal Joel Diño, lumad nga taga Pampanga nga nadestino sa 6th Infantry (Kampilan) Division (ID), Philippine Army.
Sa taho gikan sa 6th ID, nasayran nga nagpatrolya ang biktima uban ang iyang mga kauban duol sa ilang detachment sa Mother Kabuntalan.
Gikanayon nga natamakan sa sundalo ang Cobra hinungdan nga gipahit siya sa paa.
Gitabang si Diño sa iyang mga kauban ug gidala ngadto sa Camp Siongco Hospital sa 6th ID Headquarters sa Barangay Awang, Datu Odin Sinsuat sa nahisgutang probinsiya.
Apan gibalhin dayon ang sundalo sa tambalanan sa siyudad sa Cotabato ug padayon nga gi-atiman sa mga doktor.
Nasayran nga daghan nang King Cobra ang napatay sa mga mag-uuma sa Maguindanao ug North Cotabato ilabi na sa tiilan sa Mount Apo. (Edgar E. Fuerzas)