Sara: Misyon: pagtukod sa katilingban nga mapasayloon

"THIS is the day that the Lord has made," ang espirituhanong mensahe sa presidente sa (CBCP) Catholic Bishops Conference of the Philippines nga si Archbishop Romulo Valles ug Archbishop sa Davao isip maoy nangulo (principal consecrator) sa liturhikanhong seremonyas.

Didto sa Christ the King Cathedral sa siyudad sa Tagum, gitambongan sa 27 ka mga Obispo ug kapin kon kulang 100 ka mga pari ang misaksi ug mitimbaya sa bag-o ug opisyal nga giordenahan ug gipahimutang isip maoy haligi sa Diyosesis sa Tagum nga si Bishop Medil Aseo niadtong Hunyo 20, 2018.

Sumala sa pagduki-duki, si Bishop Aseo maoy ikaupat nga nahimong Obispo sa diyosesis sa Tagum, ang lugar diin didto nahimugso ang unang GKS (Gagmay'ng Kristohanong Simbahan) kun BEC.

"As you can see, our new bishop's mission, any bishop's mission, is not easy," ang saysay sa president sa CBCP Arsobispo Valles, dugang pa niya, "Bishop Medil must be teacher, shepherd and high priest in the place of Christ."

Si Pope Francis, ang Obispo sa Roma, nagpahinumdom sa tanang katoliko sa matag rehiyon sa mga importanteng butang nga nakasalalay sa atong gihuptan nga pagtoo. Usa sa iyang dakong misyon mao ang pag-atiman sa iyang mga katawhan isip kabahin sa usa ka tawhanong pamilya.

Ang pagtukod og katilingban diin anaa ang simpleng pagpuyo, mas mahigugmaon nga kinabuhi ug labaw sa tanan, ang pagpinasayloay sa usag-usa.

"There is no greater novelty than forgiveness, which turns evil into good," matud ni Pope Francis.

Ang pag-ampo sa Amahan Namo kun "Lord's Prayer", nag-abli sa ganghaan alang kanato sa panaw alang sa espirituhanong kinabuhi diin niining atong pagpanaw anaa kanunay nga pagpangita sa kahiusahan ug kalinaw.

"Father, bread, forgiveness," dason ni Pope Francis. Nga kining tulo nga mga pulong maoy modala sa tanang katawhan ngadto sa pinakauyokang bahin sa atong pagtoo. Panahon nga moingon kita, "Amahan Namo, nga anaa sa Langit", gipahinumdoman kita nga ang Ginoo naghatag kanato sa bag-ong kinabuhi ug gihiusa kita isip usa ka dakong pamilya.

Dinhi niining pag-ampo nga ang matag usa "human being" maoy kabahin sa atong pamilya ug gitawag sila aron mamahimong "good guardians" diha sa pamilya ug katilingban.

"God commands his children to love each other from the heart," pulong ni Pope Francis.

Sa atong pangamuyo moingon kita, "Ang kalan-on namo sa matag adlaw, Ihatag kanamo karong adlawa," kini nagpasabot lamang nga naghangyo kita sa Ginoo nga tabangan kita nga dad-on kita ngadto sa mas simple ug yanong pagkinabuhi.

Ang tumang kabuhong sa kalibutan mohatag og katagbawan sa kinabuhi sa tawo apan mohatag sab kini og kauhaw diha sa matag kasingkasing sa tawo. Nga unta ang matag tawo makadiskobre sa "the courage of silence and of prayer".

"Ang kalan-on namo" kini nagpasabot nga dili unta kita makalimot sa "life-giving power" ni Hesus. Siya ang atong "regular diet for a healthy living" ug kung wala Siya, ang atong kinabuhi walay kahulogan, "meaningless".

"Ug pasayloa kami sa among mga sala", nag-ampo kita nga unta kita ang mamahimong instrumento sa pagpasaylo ug kabag-ohan. Ang tawag sa pagpasaylo dili sayon ug kini gasa gikan sa Ginoo, ang tuburan sa kalooy ug pasaylo.

Mag-ampo kita sa usag-usa nga dili unta kita mawad-an og kusog ug dili mohunong diha sa pagbuhat sa kalooy ug pasaylo. Kay ang pagpasaylo mobag-o ug mohimo'g mga milagro.

Human kita makadawat sa konkretong pasaylo gikan sa Ginoo, "each of us is born again as a new creation when we love our brothers and sisters", matud pa ni Pope Francis.

Dugang niya, "when we love one another and we forgive each other from the heart," malipayon na ang Ginoo.

Busa, sugdan nato ang pagtukod og pamilya ug katilingban nga anaa ang diwa sa pagpasaylo ug pagbag-o. Kay dili lang kini misyon sa atong mga kaparian ug kaobispohan kon dili ato kining tanan.

(comment/feedback-09109006290)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph