Mga duwa karon
4:30 pm- Rain or Shine batok Meralco
6:45 pm- Ginebra batok Alaska
LANGKATON og suway sa Rain or Shine Elasto Painters ang No.1 nga puwesto sa ilang pagpakigbatok sa Meralco Bolts sa premirong duwa karong hapon sa Philippine Basketball Association (PBA) Commissioner’s Cup sa Araneta Coliseum.
Ang Elasto Painters kasamtangang nagsolo sa liderato dala ang 8-1 nga rekord apan ning puntoha, wala pa sila’y kaseguroan nga masulod sa top two spots nga nagtangag og twice-to-beat nga benepisyo sa playoffs.
Hinuon hayag na kaayo ang poruhan sa Elasto Painters nga makabaton og twice-to-beat nga bintaha tungod kay nagkinahanglan na lang silang modaog og usa sa katapusan nilang duha ka mga tahas gikan karon aron makaseguro’g puwesto sa top-two.
Gani, bisan mapilde pa ang Elasto Painters sa katapusan nilang duha ka mga tahas, aduna gihapon sila’y poruhan nga makasulod sa top two depende sa resulta sa nangahabiling mga duwa sa ubang teams hilabi na sa mga sikit nga naggukod kanila.
Ang Bolts usa sa tulo na lang ka teams nga karibal sa Elasto Painters sa inilugay sa top two nga luna.
Ang Bolts, nga kasamtangang adunay 7-3 nga rekord, mosagubang sa katapusan nilang duwa sa elimination round.
Kon modaog ang Bolts ning sangkaa, moamag ang ilang poruhan sa inilugay sa top two.
Apan kaya kaha sa Bolts ang pagputol sa kainit nga gipakita sa Elasto Painters?
Labing seguro, nagkinahanglan ang Bolts og silingan sa perpekto nga duwa aron masanta ang Elasto Painters.
Ang Elasto Painters gikan sa unom ka sunodsunod nga kadaugan ug katapusan kining nakaangkon og kapildihan kaniadto pang Mayo 9 batok sa Columbian Dyip, 96-104.
Sa ilang bahin, ang Bolts gikan sa 85-91 nga kapildihan batok sa Talk N’ Text KaTropa niadtong lang Biyernes.
Sama sa Bolts, ang KaTropa adunay 7-3 nga rekord ug buhi pa sab ang paglaom niini aron makasulod sa top two.
Sa main game karong gabii, kulbahinam sab nga kombati ang gilaumang masaksihan kay magparang ang Alaska Aces ug crowd-favorite Brgy. Ginebra Gin Kings.
Ang Aces nahilakip sa teams nga aduna pa’y poruhan nga makasulod sa top two. Naggunit sila og 7-2 nga rekord.
Ang Gin Kings kasamtangang nagbitay sa ikapitong dapit ug padayon pa kining nanikaysikay aron makaseguro og luna sa playoffs.
Human sa elimination round, ang mopatigbabaw lang nga walo ang makaabante sa playoff. (ESL)