GIHATAG ni Bise Mayor Edgardo Labella ang 25 beds sa hospital ngadto sa unang 25 ka mga barangay sa dakbayan sa Sugbo.
Ang mga higdaanan gitagana para sa mga health center nga nagbase sa mga barangay.
“Ang mga health center nato sa barangay mopaanak naman sila unya wala silay klarong kahigdaan,” matod ni Labella.
Gawas niini, nahingawa usab ang bise mayor, nga usa na usab ka senior citizen ngadto sa iyang mga kauban nga edaran kinsa magpa-check-up sa ilang blood pressure.
“Naluoy kaayo ko nga wa sila'y maayong kahigdaan hilabi na kadtong mga senior citizen nga taas og dugo atol sa check-up,” pasabot presidente sa PDP-Laban sa dakbayan.
Kini naglangkob sa mga barangay Quiot, Bacayan, Tagbao, Sudlon 1, Sudlin 2, Basak San Nicolas, Cogon Pardo, Sta. Cruz, Pahina San Nicolas, Budla-an, Taptap, Toong, Tisa, Duljo Fatima, Suba, Pasil, Kamagayan, Pamutan, Pung-ol Sibugay, Cambinocot ug daghan pa.
Gipadayag niya nga gumikan sa maayong feedback nga iyang nadawat, ang nahabiling 55 ka barangay sa Cebu City nga wala mahatagi, iyang tunolan.
Ang mga kapitan o barangay kagawad mopalista lang didto sa iyang buhatan aron makuha ang ilang hospital beds.
Gipahibawo sa bise mayor ang laing hut-ong sa pag-apud-apod sa dugang beds ipahigayon duha ka semana gikan karon.
Ang mga katri gikan sa mga private hospital sa siyudad kinsa nag-upgrade sa ilang mga higdaanan gikan sa manual ngadto sa usa ka digital. (PAC)