NIPASALIG si Bise Gob. Agnes Magpale nga tabangan si Gob. Hilario Davide III pagpangita sa posible niining running mate alang sa 2019 midterm elections.
Kini human nihangyo niini ang gobernador. Gibarogan ni Magpale nga dili na gyud siya interesado nga molansar sa eleksiyon ug buot na niyang moretiro sa pulitika.
Daw sa wala na’y makausab sa hunahuna ni Magpale nga hingpit nang moretiro sa pulitika.
Matod sa opisyal, gusto na siyang moundang tungod usab sa iyang pangidaron. Gani nagkanayon siya nga 2010 pa unta siya gustong moundang.
Wala hinuon siya magbasol nga nakaserbisyo pa siya ug motapos pa sa iyang ikaduhang termino pagka-bise gobernador sa sunod tuig.
Si Magpale nahimong board member sa ikalimang distrito sa Sugbo, nahimong bise gobernador sa 2011 nunot sa kamatayon ni Greg Sanchez, acting governor niadtong 2012 nunot sa suspensiyon ni kanhi gobernador GwenGarcia ug nidaog sa pagkabise gobernador pagka-2013 ug 2016, pares ni Davide. (AZLG)