ADUNA na’y person of interest ang kapulisan sa mamumuno nga nipusil kang outgoing Calamba Barangay Councilor Eldebrando Ygoña niadtong Biyernes pasado alas 5 sa hapon.
Gibutyag ni Cebu City Police Office (CCPO) Director Joel Doria sa interview niini sa Sun.Star Cebu kagahapon nga aduna na sila’y person of interest sa maong kaso base na usab sa impormasyon nga nakuha nila gikan sa mga saksi.
Dugang ni Doria nga wa pa sila’y ngan niini, apan daghan silag witness tungod kay daghan ang nakamatikod sa gunman.
Duha ka mga anggulo ang gitan-aw sa kapulisan nga motibo sa pagpamusil kang Ygoña, usa niini ang work-related.
Tungod kay nasayran nga aktibo ang konsehal sa kampanya batok drugas ug posibleng gibawsan siya niini.
Samtang ang usa, personal grudge, o aduna’y personal nga kalagot.
Apan niingon ang director nga kinahanglan pa nila ang kongkreto nga ebidensiya sa nagpusil sa konsehal.
Matod sa mga pulis nga matag anti-drug operation, si Ygoña lang sa mga barangay official ang mopirma isip saksi. (HBL)