Armas, drugas nasakmit gikan sa 9 ka mga tawo

SOBRA sa P100,000 nga kantidad sa gituohang shabu ang nasakmit sa kapulisan sa dakbayan sa Lapu-Lapu sa lima ka managlahing mga buy-bust operation sukad Biyernes sa hapon hangtod kagahapon sa buntag.

Moabot sab ngadto sa siyam ka mga drug personality ang nasikop sa mga taga Lapu-Lapu City Police Office (LLCPO) atol sa sunod-sunod nga operasyon.

Ang labing uwahing nasikop sa taga Station 2 sa LLCPO sa Sitio Angasil, Brgy. Mactan mao si Brian Segarra, 36, lumolupyo sa maong dapit.

Nadakpan si Segarra atol sa operasyon pasado alas 6 sa buntag kagahapon human siya napalitan og usa ka paketeng shabu bugti ang P300 sa pulis nga nagpaka-aron ingon nga poseur buyer.

Nakuha niya ang usa ka medium, siyam ka gagmayng pakete sa gituohang shabu nga motimbang og 6.2 gramos nga may Dangerous Drugs Board (DDB) value nga P73,150.

Gawas sa drugas, nakuha sab gikan kaniya ang usa ka .38 kalibre nga armas nga may tulo ka mga bala, ug P300 nga buy-bust money. Lima ka oras sa wa pa masikop si Segarra, upat ka mga tawo ang nasikop sab sa Zone Litob, Barangay Kalawisan pasado ala una sa kaadlawon.

Ang mga dinakpan mao sila si Marlowe Pejo, 23; Eulogeo Amit Jr. 26; Keith Tumulak, 40; ug Jenemay Zepede, 23.

Nakuha gikan kanila ang 17 ka gagmayng pakete sa gituohang shabu nga motimbang og .85 gramos ug may DDB value nga P10,030 ug buy-bust money nga P200.

Niadtong Biyernes, unang nasikop sila si Dean Mark Rojo, 27, ug Clifford Henson, 26, sa Zone Lato Calawisan, mga alas 3 sa hapon.

Nakuhaan sila og 21 ka gagmayng pakete nga gituohang shabu nga motimbang ngadto sa .63 gramos ug may DDB value nga P7,434; P300 buy-bust money ug P350 nga kinitaan.

Si Dean Ma. Teresa Sacristan, 37, taga Zone Pansit, Brgy. Calawisan, nasikop sab pasado alas 4 sa hapon.

Nakuha gikan niya ang 23 ka gagmayng pakete sa shabu nga motimbang og .69 gramos ug may DDB value nga P8,142, P300 nga buy-bust money ug P450 nga kinitaan.

Pasado alas 10 sa gabii, si Ian Salimbot, 38, nadakpan sab sa Sitio Hawaiian, Brgy. Marigondon.

Siya nakuhaan og siyam ka pakete sa gituohang shabu nga adunay DDB value nga P2,000, P200 nga buy-bust money ug P100 nga kinitaan. (JPP)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph