GIPANIGBAS sa wala maila nga suspetsado ang duha ka mga biktima gumikan lamang kay nangutana niadtong Hunyo 20, 2018 mga alas 6:00 sa gabii diha sa Barangay Tagpangi ning dakbayan sa Cagayan de Oro.
Pabilin nga nagpaalim sa Northern Mindanao Medical Center (NMMC) ning dakbayan ang mga biktima nga sila si Ronald Guerama, 43, minyo ug Dodoy Akorpyo, 37, minyo ug pulos residente sa Barangay Taglimao ning dakbayan.
Sa nahipos nga impormasiyon gikan sa NMMC diin daling gidala ang mga biktima gikabutyag nga samtang sakay sa motorsiklo ang duha diin gimaneho kini sila Akopyo nga igo lang matud kini sila nga nangutana sa wala maila nga suspetsado.
Giingong anaa kini sila sa maong dapit aron sa pagpangita og masakyan kay lage aduna kini silay pasyente nga ipacheck-up. Nangutana matud kini sila sa maong suspek kung aduna ba’y taxi sa maong dapit apan nasuko kini sa wala masutang hinungdan.
Sa dihang pauli na ang mga biktima sakay sa motorsiklo wala kini makamatikod nga nagkuha na og sundang ang suspek ug gipanigbas ang mga biktima
Nakaangkon si Guerama og duha ka mga samad diha sa iyang kamot samtang tulo ka mga samad tinigbasan usab ang naangkon ni Akopyo diha sa iyang ilong, baba ug abaga lakip na sa kamot dapit sa iyang pulso.
Padayon pa nga nagpaalim ang mga biktima samtang giingong anaa na sa kapolisan ang suspetsado diin padayon nga gi-imbestigahan sa mga otoridad.