SILA si National Master (NM) Alexander Lupian ug Ella Grace Moulic nakakapot gihapon sa ikaduhang puwesto aron nga magpabilin nga buhi alang sa titulo sa nagpadayon sa 19th Asean+ Age Group Chess Championships standard event didto sa The Royal Mandaya Hotel.
Niadtong Sabado sa hapon, si Lupian mitali og 5.0 puntos human napugos sa pagtabla sa iyang ikapito nga hugna sa tigi uban kang Thai Hung Tong sa Vietnam, kinsa kasamtangang nag-una sa Seniors 50 and Seniors 65 division, sa ikapitong hugna niadtong Sabado sa hapon.
Si Tong duna say 5.0 samtang si Fide Master (FM) Adrian Pacis, kinsa nakigtigi kang Lupian niadtong Sabado alang sa ikawalo nga hugna sa tigi, naa sa ikatulong puwesto.
Si Moulic, chess varsity sa De La Salle University, nakakuha og kinatibuk-ang 5.0 puntos, usa lang ka puntos luyo kang girls 20 division leader Women Fide Master (WFM) Shania Mae Mendoza kinsa dunay 6.0 puntos.
Ang iyang ikapito nga hugna sa dula batok kang Thi Thuy Tien Vo sa Vietnam niadtong Sabado natapos nga tabla.
Nahimutang sa ikatulong puwesto sa iyang dibisyon mao si Women Candidate Master (WCM) Kylen Joy Mordido kinsa mitali og 4.5.
Samtang, si International Master (IM) John Marvin Miciano nakahiluna sa ikaupat nga puwesto sa under 20 division nga dunay 5.0 puntos.
Si Miciano nakatabla uban kang FM Agni Jeevitesh J Sai sa India, kinsa kasamtangang nahimutang sa ikatulo sa dibisyon, sa ilang ikawalong hugna sa tigi niadtong Sabado.
Nanguna si IM Paulo Bersamina sa dibisyon uban sa 7.0 puntos gisundan ni Azarya Jodi Setyaki nga dunay 6.0 puntos.
Si Yngayo, sa pikas bahin, nagtinga sa ikalima nga puwesto nga dunay 4.5 puntos human sa ikapitong hugna niadtong Sabado.
Napildi siya sa iyang ikapitong hugna nga dula batok kang Goc Thuy Doung Bach, kinsa kasamtangang nanguna sa girls 16 division nga dunay dominanteng 6.5 puntos.