MAS dako ang poruhan nga mabalhin si Kawhi Leonard sa Cleveland Cavaliers kumpara sa Los Angeles Lakers gumikan kay determinado ang San Antonio Spurs nga ilikay ang ilang star forward nga mahiluna sa team gikan sa Western Conference sa National Basketball Association (NBA).
Apan adunay laing teams sa Eastern Conference nga mas makatanyag og dako kang Leonard kumpara sa Cavaliers ug usa na niini ang Philadelphia 76ers.
“They (Cavs) might have a better shot than anyone in the West, but they’d be hard-pressed to compete with the kind of packages that teams like Boston and Philadelphia could put forth,” matod ni Sam Amick sa iyang artikulo sa USA Today.
Ning puntoha, ang Spurs padayon pang naglihok aron mahaylo si Leonard nga magpabilin sa ilang kiliran apan andam sab kining maminaw sa tanyag sa teams nga gustong mobira sa two-time Best Defensive Player awardee.
Ang Cavaliers dili pa makahunat kon unsa’y ilang itanyag kang Leonard gumikan kay wala pa mobuhi og pinal nga desisyon si LeBron James kon moambak ba kini’g balik sa free agency o dili.
Samtang nagkanayon si Sixers coach Brett Brown nga aduna na sila’y gihan-ay nga tanyag aron makuha si Leonard.
Sa laing bahin, nagplano si Carmelo Anthony nga gamiton ang iyang opsyon nga $28 million aron magpabilin sa Oklahoma City Thunder sa sunod season, matod sa usa ka kasaligang tinubdan.
Si Anthony usa lang sa pipila ka superstars nga puwedeng mapatong sa free agency ning maong offseason.
Sa miaging season, gikuha sa Thunder sila si Anthony ug Paul George aron makigtambayayong kang Russell Westbrook sa tinguha nga makaparang sila og insakto sa Golden State Warriors sa Western Conference.
Apan wala nahitabo ang tinguha sa Thunder.
Gikan sa labing unong sinaligan sa opensa, si Anthony nahimo na lang tigsuporta nila ni George ug Westbrook.
Talagsa na lang moabot kang Anthony ang bola sa miaging season apan bnisan pa niini, nag-average lang gihapon siya og 16.2 puntos.
Sa miaging playoffs, mikunhod ang playing time ni Anthony ug wala siya nalipay niini.
“So it’s something I really have to think about, if I really want to be this type of player, finish out my career as this type of player, knowing that I have so much left in the tank and I bring so much to the game of basketball,” asoy ni Anthony. (AP, ESL)