Talk to Papa Joe: Ako ta ang mopalit

Dear Papa Joe,

Una sa tanan, maayong adlaw kanimo diha. Itago lang ko sa ngalang Aldo. Mao ni ang akong problema mahitungod ning akong igsuon. Naa ni siya’y yuta iyang ibaligya. Akong giingnan nga akoy mopalit kay ako ang sumusunod kay magsuon mi. Ako siyang bayran pagkasunod semana. Naunsa ba iya mang gibaligya sa akong ig-agaw. Ang nakapaet kay hasta yuta nga among komon giapil og baligya nga wala naman siyay labot kay nagpabayad man siya sa among amahan.

Ang nakapalit akong gihangyo nga akong ulian, dili man mosogot. Maka file ba ako og kaso? Pila may magasto nako ani. Salamat..

ALDO

Aldo,

Kabahin sa pagsang-at og kaso, wa man nay problema kon ang dokumento naa na nimo. Nagpamatuod na nga kanang yutaa kumon na ug titulado ubos sa ngalan sa inyong ginikanan. Kay ang yuta nga titulado nga nasunod, di basta basta mabaligya ug siya siya ra mabuot kay naa man mo.

Dili ko abogado, pero base sa experience, naa na siyay gitawag nga judicial partition ug naa pa nay ancestral tax kon ibaligya. Mao nga pwede na nimo kasohon, pero pwede sa sa barangay level lang para magkasinabot.

Karon, sa kaugalingon niyang yuta, di ka kapugos kon di niya ibaligya ninyo kay iya man na. Kon iyaha man galing, wa kay labot isip sumusunod base sa imong suwat kay naa siyay pamilya. Iyang pamilya ang manunod. Pero kon kuwang akong pagsabot, mas maayo nga mokunsulta ka og abogado. Daghang salamat.

PAPA JOE

(Sa inyong tampo ipadala lang sa papajoesuperb@gmail.com

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph