CONSTANCIA C. YBANEZ
Gun-ob, Lapu-Lapu City, Cebu
MIABOT na si Diony sa dakong pultahan sa kumbento sa parokya sa Santa Rosa de Lima. Ang iyang bayhon dili na mao ang kanhing Diony nga buotan ug mahadlukon sa Diyos. Ang iyang nawong naputos na sa bangas ug tag-as nga bungot. Nagsul-ob siya’g diyaket ug nag-gora sa iyang ulo. Ang iyang balatian gilubok sa kasilag. “Pangandam, Padre Quilito, kay hukasan ko ikaw karon sa imong sotana!” matod niya.
Hingpit nga nawad-an si Diony og pagsalig sa Diyos. Iyang gihubo ang pagtuo nga aduna pay labaw nga Makagagahom nga gitahod ug gibalaan sa kinabuhi sa tawo. Kining tanan nagagumikan sa kamatayon sa pinangga niyang inahan nga gisundan pa gayud sa kamatayon sa duha niya ka anak nga pulos naaksidente sa dalan. Nahugno ang tanan niyang kadasig sa pagpakabuhi nga matarong ug nahanaw na ang tanan niyang panglantaw sa mabungahong umaabot. Misulod siya sa yawan-ong kalihukan nga maoynakabungkag sa malipayong kahimtang sa ilang pagpuyo, hangtod gibiyaan siya sa iyang asawa ug anak nga nagpas-an og mabug-at nga kahiubos.
Halos ang tanang bisyo gisudlan ni Diony. Nagpunay lang siya’g hubog-hubog ug nakighugoy-hugoy sa mga dautang elemento sa katlingban. Na-adik na siya sa ginadiling drugas; miapil pa gayud sa hut-ong sa mga ‘gun for hire’, pagpamalegra ug pagpangilkil sa mga drayber sa kadalanan, ug uban pa. Ug moligdas na lang sa aseras sa subrang kahubog.
Miabot ang kasilag ni Diony sa tinuhoan Katoliko dihang iyang nasayran nga ang iyang asawa nga si Maming didto modangop sa pari sa ilang parokya ug misulod isip katabang sa mga lihikon sa kumbento. Ang labaw nga nakangil-ad kay gisukmil sa sayop nga pagtuo ang pangagpas ni Diony. Maoy mipasulabi sa iyang hunahuna ang yawan-ong pagtuo nga si Maming gibabaye ni Padre Quilito.
Hilabihang nakapaminti si Diony. Wa siya mahimutang hangtod gidaog siya sa gahom ni Satanas nga kusganong nagtukmod kaniya aron sulngon ang kumbento sa ilang parokya aron ihuyad pagtigbas ang suwab sa nagpangligtiw nga agda sa yawan-ong pagtuo nga may dautang gibuhat ang alagad sa Diyos sa iyang kapikas sa kinabuhi.
MOSAKA na unta si Diony sa itaas sa kumbento dihang maoy nabantang sa iyang tinan-awan ang rebulto sa Mahal nga Birhen nga gitungtong sa usa usa ka talad. Ug sugo sa gihambin nga pagdumot iyang gipunit ang rebulto ug gihugtan pagkupot sa duha niya ka kamot ug unya iyang gituboy sa itaas aron ilambos sa salog. Apan wa mahinayon ang dautan niyang tinguha tungod kay kalit nga nanggahi ang iyang mga bukton ug namikog ang tibuok niyang lawas. Sa tumang kalisang naniga ang iyang mga mata nga nakakita sa dugo nga mitubod sa mga mata sa Mahal nga Birhen. Nakasinggit siya sa kalisang ug namulong, “Pa-pasayloa ako, Ginuo! Pa-pasayloa intawon ako! Nakasala ako sa pagpasipala kanimo!” Inanay siyang nalun-oy ug nalusbog sa salog. Apan bisan nawad-an na siya sa panimuot, wa gyud niya mabuhii ang rebulto. Hugot ang iyang pagkakupot niini.
Maoy namatngunan ni Diony nga gihakop siya ug gisagakay sa pagbarog ni Padre Quilito. Wala makapugong si Diony sa iyang mga luha nga migakos sa pari. Ug puno sa pagpaubos miluhod siya atubangan sa pari.
P-Pasayloa ako, Padre, sa dako kong sala nga nahimo!” matod ni Diony.
Gitutokan ni Padre Quilito si Diony nga nagduko ug namulong, “Anak, gipasaylo ka na sa imong mga sala. Pauli ug dad-a si Maming aron magpuyo na kamo nga malinawon balik sa sabakan sa katarong!” (KATAPUSAN)