HALOS tanang mga Sugboanon pulos nagbagolbul sa higayon nga mobiyahe sila paingon sa dakbayan sa Sugbo kay taas kaayo ang panahon una sila maabot aron mangompra ug mosuroy sa mga dagkong mall, magkuha sa mga importante nga mga papeles kansang mga ahensiya sa gobyerno ania mahimutang ug ang uban motuyo sa pagdakot sa balaang bata nga si Snr. Sto. Niño.
Bisan asa ka man nahimutang sa lalawigan sa Sugbo, kaniadto taas na kaayo ang tulo ka oras nga biyahe paingon sa dakbayan sa Sugbo apan karong panahona moabot na og tunga sa adlaw ang imong biyahe.
Ang pag-ayo ug katukoran sa kadalanan diin ang uban niini wa pa mapahigayoni sa “widening” di na paigo sa daghan na kaayo nga gibaligya nga sakyanan nga nagbiyahi ilabi na nga lisod usab ang paghimo ug pagpalapad niini.
Apan, ang problema sa trapiko sa Metro Cebu lain usab nga hagit sa biyahe paingon sa dakbayan sa taas na nga katuigan.
Karong Hulyo 18, adunay usa ka kompaniya nga molusad sa water bus diin makapasakay kini og 70 ka mga pasahero ug inisyal niini nga biyahe ang gikan sa dakbayan sa Sugbo paingon sa lungsod sa Oslob nga gidumog sa mga turista sa “whale watching”.
Kini nga tinguha mohatag kini og kausaban sa natad sa transportasyon sa Sugbo, kana kon maayo ang pagkadala niini ug kon suportahan usab sa tagsa-tagsa ka kagamhanan sa mga kalungsuran nga serbisyohan niini.
Ning higayona, daw sa nihaum usab kining water bus kay ang pipila ka mga kalungsuran ug dakbayan nagtinguha nga motukod og mga reclamation project nga apil niini ang dapit alang sa pantalan. Sayon nalang unya usab ang pagdunggo sa water bus.
Makuhaan na unya ang kahasol sa mga pasahero ning paglusad sunod buwan sa water bus kay aduna naman silay laing klase sa transportasyon nga kapilian alang sa ilang biyahe sa dakbayan sa Sugbo.