IPATUMAN na sugod karong semanaha sa Cebu City Police Office (CCPO) ang pagsikop sa mga libudsuroy ug mga istambay nga nakalapas sa balaod ug mga lokal nga ordinansa ubos sa Oplan Tambay.
Labing menos 453 ka mga tawo, menor de edad ug hingkod na ang panuigon, nga gisita sa kapulisan sa tibuok lalawigan sa Sugbo ug gipahimangnoan apan gipapauli lang gikan niadtong Biyernes sa gabii hangtod sa Sabado sa kaadlawon.
Si CCPO Director Senior Supt. Joel Doria niingon nga ang pagpatuman sa Oplan Tambay maoy ilang tubag sa mga reklamo nga ilang nadawat gikan sa mga call center agent nga dunay daghang mga istambay sa ilang dapit.
***
Lakip sa basihan sa kapulisan sa pagpangsikop ang mga ordinansa sa curfew sa mga menor de edad (City Ordinance 71086), pagdili sa roller skates (C.O. 801) ug ang noise pollution ordinance (C.O. 1940).
Laing basihan mao ang pagdili sa pagpangihi, pagpangluwa, paglabay og basura o paghugaw-hugaw ug pagkalibang sa mga publikong dapit (C.O. 1361) ug paglapas sa smoking ban ug pag-inom sa pampublikong lugar.
Didto sa kaulohan, sumala sa mga report sa mga nasudnong pamantalaan, mokabat na sa 7,000 ang nasikop nga istambay sa nagkalain-laing mga kalapasan ubos sa Oplan Tambay.
***
Apan si National Capital Region Police Office director Guillermo Eleazar nihimakak nga gidakop nila ang mga tambay (minugbo sa istambay). Ang ilang gidakop, matod niya, mga “violators of local ordinances.”
“Discard that tambay. Everyone, anyone who violates a law or an ordinance, we can arrest them. If they are not violating anything, we cannot arrest them — as simple as that,” matod pa ni Eleazar.
Ingon niana ka simple. Way gidakop nga tambay. Ang ilang gidakop mao kadtong nakalapas sa mga ordinansa. Bisan si Presidente Rodrigo Duterte niingon nga wa nay krimen nga vagrancy, busa wa siya magsugo og “arrest,” ang iyang gisugo “accost,” sitahon ra.