NAGSUGOD sa mga pasidaan o information campaign labot sa Oplan Tambay nga gipatuman sa Philippine National Police sa tibuok nasod. Sa mga dagkong dakbayan sama dinhi sa Metro Cebu sibaw kaayo ang diskusyon sa maong Oplan. Kini tungod kay daghan ang molopyo og lapad ang sakop sa operasyon.
Hinuon kon subayon og maayo di maato sa gidaghanon sa kapulisan ang pagpatuman sa maong Oplan matag gabii. Apan bisan pa man hinayhinay nila kining gipatuman nga niresulta sa daghang pangutana ug reklamo.
Dinhi sa ato si P/SSupt. Joel Doria ang Director sa Cebu City Police Office nipasabot nga ang ilang pagpatuman ipasubay sa mga ordinansa nga naaprobahan sa konseho. Sa ato pa way dakop nga mahitabo kong way ordinansa nga mahimong basihanan.
Gawas niini gusto sab ni Doria nga iapil ang barangay sa operasyon. Sa press conference dunay reporter ang nipadayag basin masinfulan o mayatakan ang tawhanong katungod sa tawo nga gidakop. Si Doria nitubag nga ang mga pulis nga mokuyog sa Oplan sangkap sa kahibawo mahitungod sa Human Rights. Sa ato pa di ka angay magduda nga giapil og signit kay giinitan sa mga pulis ang imong anak o bana.
Di malikayan nga motumaw kining duda mao awhagon nato ang mga opisyal nga maoy mangulo sa operasyon pagseguro nga di kadudahan ang ilang labok. Kay kun mamansahan gud ang ingon niini nga kalihukan kinsa pa may mosalig para sa sunod nga operasyon. Kong nakalapas sa balaod dakpon sa way pagdapig dapig. Kon angay hatagan og konsiderasyon kay balido ang rason, papaulion. Kon ikaw ang maatlan sa pulis nga nag-estorya estorya sa imong gikahinagbo nga silingan daplin sa karsada, ayaw kahadlok. Pangatarungan. Mas maayo nga may dala ka nga ID nga moila sa imong pagkatawo.
Kana bayang gikan ka sa trabaho nga maabtan og lawom nga gabii, di kalikayan nga sa di pa ka moabot sa inyong balay maagian nimo ang nagtambay nga mga silingan. Angang man og di ka motimbaya. Samot na kon dunay gustong makig-estorya, ang ang og imong bungolbungolan. Mao nga sa Oplan di tanan nga nag tambay dakpunon. Nakahibalo niana ang mga pulis busa di angay mahadlok kon ikaw naa sa katarungan.
Pero kog maatlan nga wa gyuy igong kapasikaran mao ni giingon nga atubangon nalang. Kinsa man guy wa kaagi og tambaytambay. Ang ato lang nga sa habig sa mga pulis og sa mga giingong nakalapas sa balaod way mapasakitan ug way katungod nga mayatakan