USA ka pari nga sakop sa Archdiocese of Cebu miangkon nga nanag-iya siyag armas.
Bisan sa pagsupak sa mga opisyal sa simbahan batok sa kaparian nga gikataho nga naghupot og armas alang sa ilang kaugalingong proteksyon.
Si Fr. Marty (di tinuod nga pangalan) misugot nga magpahinabi sa Sun.Star Cebu ubos sa kondisyon nga di mogawas ang iyang pangalan.
Miangkon si Fr. Marty sa Sun.Star Cebu nga usa siya sa pito ka mga pari sa Cebu nga naghupot og armas nga may lisensiya.
Apan gipasabot sa pari nga wa nila gigamit ang ilang pistola alang sa kadautan o manghulga kondili alang sa palingkawas.
Matod niya nga “competition shooter” siya ug naapil siya sa duwa sukad pa niadtong bata pa siya.
“My father and uncle, who were both gun owners, influenced me to practice shooting. Nindot man gyud ni ang feeling kung maka-firing ka, makatabang siya og release og emotion,” saysay ni Fr. Marty.
Nitataw siya nga iyang gugma sa “competition shooting” nisunod kaniya bisan sa panahon nga batan-on siyang pari.
Matod ni Fr. Marty nga kaniadto, gamiton niya ang karaang armas sa iyang amahan kon anaa siya sa firing range aron magbansaybansay sa “shooting.”
Apan, dihang nisugod na siya sa competition shooting, si Fr. Marty midesider nga mopalit og kaugalingon niyang armas.
Nanag-iya siya karon og STI .40 caliber pistol.
Bisan og lisensiyado siya nga tag-iya og armas sukad sa iyang pagkabata, si Fr. Marty wa motug-an ni bisan kinsa nga kauban niyang pari nga ang pamusil maoy iyang kalingawan.
Mitug-an siya nga sa wa pa siya mosugod sa iyang kalingawan, nangayo siya og permiso kang kanhi Cebu Archbishop Ricardo Cardinal Vidal nga tugtan siya nga makaangkon og pistola.
“Nananghid gyud ko ato ni Cardinal. I told him nga wala koy intention nga mamusil og laing tawo but for competition and leisure only,” saysay ni Fr. Marty.
Bisan gihilabtan siya kaniadto, nipadayag si Fr. Marty nga wa niya gamita ang kahanas o iyang armas niadtong nibiktima kaniya.
Gani, nag-awhag siya sa iyang kaubang mga pari nga di mopalit og armas alang sa ilang personal nga proteksyon.
Nagtuo si Fr. Marty nga ang mga hulga ug pagpanghadlok gikan sa diskuntento nga mga parokyano lakip sa ilang trabaho isip mga pari.
“Whether we like or not, naa gyuy dili makauyon sa atong wali o sa atong pagdala sa parokya. Pero dili na rason nga magdaladala ta og pusil kay ang threats sa kinabuhi part man na sa atong mission,” midugang si Fr. Marty. (JKV sa Sun.Star Cebu)