“Sorry Ironman fans, I am not changing my mind.”
Kini ang mensahe ni Cebu City Mayor Tomas Osmeña niadtong mga mahiligon sa paugnat sa kusog lakip ang mga nanaway, kinsa misaway kaniya nunot sa wa niya pagtugot sa Ironman triathlon nga makagamit sa Cebu South Coastal Road (CSCR) isip parte sa rota sa lumba karong tuiga.
Sa iyang official Facebook page, ang mayor ni-post og pagpasabot nga gipetsahan niadtong Hunyo 23 nganong ang internasyonal nga kompetisyon angayan nga mangita og laing lugar.
“With N. Bacalso Ave. already being affected by the construction of the underpass, the SRP (South Road Properties) will not be shut down. I know that there are thousands of you (Ironman fans), but there are tens of thousands more who need that road to commute. I will not let traffic get worse for them,” nagkanayon ang mayor sa iyang gi-post.
Sa iyang news conference niadtong Biyernes, si Osmeña namahayag nga di sayon nga desisyon ang iyang gibuhat apan manubag siya sa publiko kon ang kalabutan sa trapiko ug kaluwasan sa karsada ang hisgutan.
Midugang siya nga dihang ang parte sa karsada gisira niadtong Agusto sa milabayng tuig alang sa Ironman, duha ka aksidente ang nahitabo sa laing lane kay gihimo man kini nga “two way street.”
“Turning one side of the South Coastal Road into a two-way road is also very dangerous, as can be seen from the two collisions that occurred the last time we tried it. It is very prestigious to host the Ironman, but I don’t want that prestige if it hurts my people and makes them miserable,” matod ni Osmeña.
“There are other, less populated parts of Cebu who can host the Ironman with no detriment to their constituents. I’m sure they are very willing to have you. Good luck on your event,” midugang siya.
Ang lumba gitakda sa Agusto ug mosugod kini sa dakbayan sa Lapu-Lapu nga mao nay naandan sa mga milabayng katuigan. Parte sa second leg, ang 90 kilometro nga lumba sa bisikleta nga anha ipahigayon sa CSCR.
Ang mga organizer nangayo og pipila ka adlaw aron ilang usbon ang rota sa lumba. (RTF sa Sun.Star Cebu)