TUNGOD sa agu, nga nadunggan sa iyang asawa, nasakpan ang usa ka bana human kini maatli nga nakighilawas sa usa ka sikretarya sa barangay haduol nga payag sa ilang panimalay niadtong Sabado sa gabii sa usa sa mga barangay sa lungsod sa Tabogon, amihanang Sugbo.
Wa mahuman ang pagtubag sa lawasnong panginahanglan nila ni John, 49, ug Ellen, 46 (dili tinuod nga ngalan) human sila masakpi ni Angelica, 51, (dili tinuod nga ngalan) dihang nakadungog siya og agu pasado alas 11 sa gabii niadtong Sabado.
Matod ni SPO1 Epifanio Comedido sa Tabogon Police Station, kinsa mao ang imbestigador, nga pursigido nga mopasaka og kasong adultery ang asawa batok sa iyang bana ug sa giingong kabit niini.
Usa ka Overseas Filipino Worker (OFW) si Angelica kaniadto ug wa siya makahibawo sa pagpangabit sa iyang bana dihang nagtrabaho pa siya sa Taiwan.
Moabot sa 30 ka tuig na nga minyo sila si Angelica ug John.
Human siya mihunong sa iyang pagpanarbaho tulo ka tuig na ang nakalabay giingon nga daghan na siyag hungihong nga nadungog nga magsige na og angkas si Ellen kang John sa motorsiklo niini.
Ug niadtong Sabado dihang nasakpan na niya ang iyang bana nga nakighilawas sa laing babaye.
Giingon nga nadunggan ra ni Angelica ang agu ug gipangita niini kon asa kini dapit.
Ug didto niya natultulan ang usa ka payag nga duol ra sa ilang panimalay ug nisuway kini og lili, didto niya naatlan ang duha nga hubo ug nag-sex.
Dali kining nanawag sa iyang silingan ug nanawag sa kapulisan.
“Mas gwapa pa man ang asawa,” matod ni Comedido sa phone interview niini sa SunStar Cebu.
“Ang kabit kay manokon ug morag naay goiter. Mao ni gitawag nila nga love is blind,” paghulagway niya.
Dugang ni Comedido nga niingon si John niya nga wa na siyay gugma ni Angelica ug wa na usab sila nag-ipon niini.
“Sa mata sa balaod, minyo gihapon sila kay wala pa man ma-annul ang ilang kasal,” nagkanayon ang pulis. (B)