NAGSIGE pa gihapon og abaga sa pagbayad ang kagamhanan sa probinsya sa Misamis Oriental sa pagpangulo ni Governor Yevgeny Vincente Emano.
Kini kalabot sa utang sa probinsya ngadto sa PhilHealth nga moabot og P305 milyon alang sa tuig 2012 ngadto 2013 nga giingong gibiyaan sa administrasyon ni kanhi Governor Oscar Moreno.
Atol sa press briefing gipasabot ni Dra. Vivina Casino ang Head sa Provincial Health Insurance Office (PHIO) nga ang kanhi administrasyon nagbilin og P305 milyon nga utang nga nikober sa mga benipisaryo nga nanginahanglan niadtong tuig 2012 ngadto 2013.
“So far sa paglingkod ni Governor Bambi Emano moabot na sa P88 milyon ang nabayad.” pasabot ni Casino ug miingon nga ang nabilin nga utang karon panahona moabot na lamang sa P216 milyon.
Butang nganong gimugna ni Bambi ang Misamis Oriental Care System.
Sa pagkakaron gipasabot ni Casino nga obligado ang kagamhanan sa probinsya nga magbayad sa nahilibilin nga utang tungod kay aduna silay kasabutan karon sa Philhealth ug mao sab ang rason nahatagan sila og programa nga mao ang Point of Care.
Gipasabot sab niini nga niadtong governor’s forum niadtong bulan sa Mayo nagpadala si Bambi og sulat sa buhatan sa Philhealth aron sa paghangyo nga dili nalang pabayaron niining nahibilin nga balayrunon gumikan kay dako ang pundo nga gibubo niini sa panudlanan sa Health.
“Nag spend si Gov Bambi og P600 milyon for health services nato kada tuig. Mao nga atong gihangyo ang Philhealth nga dili nalang ta pabayron ato nga nabilin nga utang kay dako man sab kaayo ang gitagana ni Gov. sa serbisyong panglawas.” matud niini.
Malaumon kining positibo ang tubag sa Philhealth labot niini aron dili na mag-abaga ang probinsya sa utang nga gibyaan sa kanhi administrasyon nga daw sa susamang panahon gabayad na sa utang gapundo pa og dako alang sa panglawas sa katawhan sa lalawigan.