ABI gyud nako og mag-party list congressman si Mayor Aljun Diamante isip second nominee sa National Alliance of Movements For Federalism, Inc. (NAMFED) nga bag-o lang ni-apply isip usa ka grupo nga party list
Apan lahi ang niguwang mga balita karon kay sila na man ni Diamante ug kanhi kongresista Pablo John PJ Garcia ang magtigi alang sa pagka kongresista sa Tersero Distrito.
Wa ko magtuo nga mahitabo kini kay pareho man silang mga sakop sa PDP-Laban nga mao ang partido sa administrasyon.
Si PJ Garcia sakop sa One Cebu nga kaalyado sa PDP-Laban dihang nidaog sa miaging 2016 si Mayor Rodrigo Duterte. Tuod man, nahimong sakop sa PDP-Laban ang mga Garcia pinangulohan ni Kong. Gwen Garcia nga usa sa mga deputy speaker sa Lower House.
Gikan sa Liberal party sa miaging piliay, si Diamante taud-taud na sab nga nihurar isip sakop sa PDP-Laban didto sa kaulohan. Si Senate President (niadtong tungora) ug PDP-Laban President Koko Pimentel ug si House Speaker Bebot Alvarez ang nihurar ni Diamante sa miaging Agusto 2017.
Mao nga dihang nanghurar ang ubay-ubay sa mga sakop sa Liberal Party isip sakop sa PDP-Laban diha sa Plaza Independencia sa miaging Nobyembre 2017, nag-abot silang Diamante ug ang mga Garcia.
Bisan pa man, makaingon kita nga niadtong tungora dako ang plantsahunon sa liderato sa PDP-Laban. Lalim bay nag-abot sa plaza sila si Mayor Diamante ug ang lider sa oposisyon diha sa Tuburan nga si Daphne Lagon nga kaalyado sa mga Garcia.
Nagtuo ko nga hapsayon kini sa liderato sa partido didto sa Syudad sa Davao. Atong nasabtan nga dunay papel ang mga higala ni Diamante didto sa Davao niining iyang desisyon karon.
Mao nga wa ko magdahom nga magbangga silang PJ ug Aljun.
Ang ako lang gyud hinuon nga nabantayan nga kasagaran, ang mga nasudnong politiko mo-adjust sa kahimtang sa Sugbo. Lisud pugson ang lokal nga kahimtang nga motuman sa kagustohan sa mga nasudnong lider.
Sa laing bahin, posibleng kontento ang nasyonal nga pulos sakop sa PDP-Laban ang magtigi sa Tersero. Kay sa ingon niini nga kahimtang, walay makuhang lider ang mga kandidato alang sa pagka senador sa Liberal Party.
Sa lalawigan, lisud pa maaninaw karon ang mahitabo.
Samtang atong malantaw nga usa ra ang kandidato sa PDP-Laban alang sa pagka gobernador nga mao si Kong. Gwen Garcia, manghinaot kita nga mosuporta kaniya ang mayoriya sa League of Municipal Mayors sa lalawigan ug lider sa lokal nga kalihokan alang sa pederalismo.
(@anol_cebu sa Twitter)