NABAHIN ang nagkahiusang partido sa PDP- Laban sa dakbayan sa Mandaue kini human tagsa-tagsang nipahigayon og mass oathtaking sila si Mandaue City Mayor Luigi Quisumbing ug Kongresista Jonas Cortes sa mga bag-ong napili nga barangay ug Sangguniang Kabataan (SK) officials.
Moabot ngadto sa 14 sa 27 ka mga kapitan ang nitambong sa oathtaking nga gipasiugdahan ni Cortes niadtong Dominggo sa gabii sa JCentre Mall samtang 13 ka mga kapitan lang ang nitambong sa oathtaking ni Quisumbing sa City Cultural and Sports Complex kagahapon sa buntag.
Sa dihang nahinabi sa mga tigbalita, si Quisumbing niingon nga nagdahom siya nga motambong ang tanang 27 ka kapitan sa dakbayan sa iyang gipasiugdahan nga mass oathtaking sanglit ang dakbayan man ang ni-sponsor sa maong kalihukan.
“Quite frankly, it’s the latest in a string of quite puzzling moves by certain groups and certain personalities in Mandaue City,” matod ni Quisumbing sa mga tigbalita.
Apan atol sa interbyu, si Cortes nagkanayon nga ang iyang kalihukan alang unta sa mga kagawad, SK presidents ug mga konsehals niini sanglit nanumpa naman ni Presidente Rodrigo Duterte ang mga kapitan sa Hoopsdome sa dakbayan sa Lapu-Lapu sayo ning buwana.
Mokabat sa 13 sa 27 ka mga bag-ong kapitan sa Mandaue ang nanumpa atubangan ni Quisumbing ug 14 ka mga kapitan nanumpa ni Cortes sa samang adlaw apan managlahi ang dapit. (JPP)