CITY Health Officer (CHO) sa siyudad sa Naga, Sugbo, gireklamo sa ginikanan human giingong nihatag og tambal alang sa allergy ug panakit sa kalawasan sa 7-anyos nga pasyente sa dengue hinungdan nga namatay.
Apan gireklamong doktor nanalipod nga base sa laboratory tests sa bata, wala gi-dengue ang bata. Grade 3 na unta ang bata nga si Keith Gabriel Garjas apan namatay niadtong Hunyo 2.
Ang reklamo sa inahan nga si Mirasol, wala hatagi sa insaktong medikal nga atensiyon ang bata sa Vicente Mendiola Center for Health sa siyudad sa Naga.
Partikular nga gireklamo ni Mirasol si City Health Officer Doctor Regil Kent Villamor, kinsa iyang gitumbok nga niresita lang og tambal alang sa allergy ngadto sa iyang anak ingun man tambal alang sa panakit sa lawas ug hilanat ug vitamins nga zinc sulfate.
Dihang gidala sa inahan sa health center sa Naga ang bata niadtong Mayo 30, niabot na ngadto sa 40 degrees Celsius ang temperatura sa bata ug nagreklamo na kini labot sa kakatol sa nanubo nga rashes diha sa iyang lawas.
Nagpatabang si Mirasol sa sibyaanang dyHP sa tinguha nga makakuha ug katin-awan labot sa nahitabo sa bata.
Si Dr. Villamor ningon nga hilanat ug joint pain maoy reklamo sa pasyente hinungdan nga giresetahan niya kini og Ibuprofen ug Ceterizine tungod sa pangatol niini.
Gipasabot sa doktor nga above normal ang resulta sa Complete Blood Count (CBC), white blood cell levels. Giitambagan ang ginikanan nga iablik ang bata alang sa follow-up check-up apan wala na kini mopatim-aw. (AZLG)