James o Harden?

MAGTIGI sila si James Harden sa Houston Rockets ug LeBron James sa Cleveland Cavaliers sa inilugay sa labing taas nga individual award nga mao ang Most Valuable Player (MVP) sa National Basketball Association (NBA).

Mao kini ang nibansiwag kagahapon dihang opisyal nang gipagawas sa NBA ang mga kandidato sa tanang mga pasidungog nga ilang buhian alang sa milabayng 2017-18 season.

Gawas nila ni James ug Harden, nahilakip sab sa mga kandiatao alang sa Kia NBA MVP award mao si Anthony Davis sa New Orleans Pelicans.

Ang mga mananaog ipahibalo karong adlawa sa 2018 NBA Awards sa Barker Hangar sa Santa Monica, California.

Gawas sa MVP, ang ubang awards mao ang Kia NBA Rookie of the Year, Kia NBA Sixth Man Award, Kia NBA Defensive Player of the Year, Kia NBA Most Improved Player ug NBA Coach of the Year.

Ang pagpili sa finalists sa tanang awards gibasi sa botasyon gikan sa sportswriters ug broadcasters gikan sa nagkalainlaing suok sa kalibutan.

Ang mga kandidato alang sa Kia NBA Rookie of the Year mao sila si Donovan Mitchell sa Utah Jazz, Ben Simmons sa Philadelphia 76ers ug Jayson Tatum sa Boston Celtics.

Sa Kia NBA Sixth Man Award, ang finalists mao sila si Eric Gordon sa Houston Rockets, Fred VanVleet sa Toronto Raptors ug Lou Williams sa LA Clippers.

Mag-ilog sa Kia NBA Defensive Player of the Year mao sila si Davis sa New Orleans Pelicans, Joel Embiid sa Philadelphia 76ers ug Rudy Gobert sa Utah Jazz.

Alang sa Kia NBA Most Improved Player mao sila si Clint Capela sa Houston Rockets, Spencer Dinwiddie sa Brooklyn Nets ug Victor Oladipo sa Indiana Pacers.

Magtigi sa NBA Coach of the Year mao sila si Dwane Casey sa Toronto Raptors, Quin Snyder sa Utah Jazz ug Brad Stevens sa Boston Celtics.

Naglangkob sa All-NBA First Team mao sila si Davis, Harden, James, Kevin Durant sa Golden State Warriors, ug Damian Lillard sa Portland TrailBlazers.

Naa sa NBA All-Rookie Team mao sila si Mitchell, Simmons, Tatum, Kyle Kuzma sa LA Lakers ug Lauri Markkanen sa Chicago Bulls.

Samtang ang nangapili sa NBA All-Defensive Team mao sila si Davis ug Jrue Holiday sa Pelicans, Rudy Gobert sa Jazz, Victor Oladipo sa Indiana Pacers ug Robert Covington sa 76ers. (AFP, ESL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph