GIPAMATUOD sa Cebu-based Avengers Taekwondo Center ang ilang kalidad human kini mikutlo og tulo ka gold medals, duha ka silvers, ug usa ka bronze sa National Taekwondo Poomsae Championships nga gipahigayon didto sa Manila sa niaging semana.
Si McAvynger Alob maoy nangulo sa team human kini mipatugbabaw sa seniors individual event sa black belt category.
Midugang og gold si Theodore Montecalvo sa individual red belt category ug ingon man si Shane Nasayao ug Bea Toring nga midominar sa freestyle pair event sa Senior’s division.
Nakapugnit og silver alang sa team si Johann Concepcion sa individual juniors division.
Ang pagpakigkauban nila ni Nasayao, Toring, Concecion ngadto nila ni Athena Nasayao ug Romeo Reyes III sa team freestyle event, nagmabungahon usab human nga sila maoy bugtong team sa Visayas nga nakakuha og medal.
Nalabni nila ang bronze sa maong kategoriya nga gipatugbabawan sa powerhouse Far Eastern University ug National University.
Si Montecalvo ug ang iyang igsuon nga si Roland ang nakalangkat usab og silver medal sa red belt team event. (PR)