GATUSAN ka pamilya ang namakwet sa panag-engkwentro sa magka-away nga pamilya sa alas 11:00 sa buntag niadtong Huwebes didto sa probinsiya sa Cotabato.
Sigun sa taho gikan sa Cotabato Police Provincial Office nasayran nga nag-abot ang mga armadong sakop ni Barangay Dungguan, Aleosan, barangay kagawad Kotek Muslimin ug barangay captain Nurhan Hamid sa Barangay Langayen, Pikit.
Hinungdan sa usa ka oras nga sinukliay og mga bala tali sa duha ka grupo gamit ang mga tag-as nga matang sa armas.
Nahunong lamang ang kagubot sa diha nga nahiabot ang puwersa sa 40th Infantry Battalion sa Philippine Army ug kapulisan sa Pikit nga gipangulohan ni Senior Inspector Elias Dandan.
Atol sa engkwentro duha sa mga sakop ni Muslimin ang napatay nga naila nga sila barangay kagawad Daud Sampayan ug ang iyang igsuon nga si Kaharuddin.
Pipila lang ka oras nga mibiya sa Sitio Hill, Barangay Langayen, Pikit, ang mga ginsakpan sa militar ug kapulisan, subli na sab nga nagpinusilay ang magka-away nga pamilya gumikan lang sa bingkil sa yuta nga ilang gi-ugmad.
Gitahasan dayon ni Cotabato Governor Emmylou Talinio Mendoza si Pikit Mayor Sumulong Sultan nga resulbahon ang panagdumot sa magka-away nga grupo pinaagi sa malinawon nga negosasyon. (Edgardo Fuerzas)