SECTIONS
Thursday , June 21, 2018
BACOLOD

World title fight ni Gesta gihan-ay

“ANG moantos ma-santos.”

Naigo na ning maong Sug­buanong panultion si US-based Cebuano Mercito “No Mercy” Gesta human natuman ang iyang dugay nang gipangandoy nga makaaway alang sa lehitimong world title.

Kon wala’y makababag sa plano ni Top Rank boss Bob Arum, si Gesta makasuway sa pag-ilog sa korona ni International Boxing Federation (IBF) lightweight champion Mexican Miguel Vasquez karong Oktubre o Nobiyembre.

Si Gesta, kinsa adunay impresibong rekord nga 26-0-1, 14KOs, katapusang nakaaway dinhi sa nasod niadtong pang Disyembre 16, 2005 diin mikulit siya’g 7th round technical decision nga kadaugan batok kang Leo Escobido sa Kidapawan City, Cotabato.

Human ning awaya, si Gesta nanimpalad sa Amerika. Giantos niya ang hataas nga panahon sa paghashas og maayo sa iyang abilidad. Giinat niya ang iyang pasensya.

Miabot sa 16 ka mga away ang iyang gisagubang sa Amerika una siya nahatagan ning maong dakong oportunidad.

Apan dili sab gyud sayon ang tanan alang kang Gesta kay kinahanglan niyang mo­naog og timbang aron ikaharong si Vasquez, kinsa adunay 31-3, 13KOs nga rekord.

Matod ni Arum kon makaya ni Gesta nga mokanaog sa lightweight (135 lbs), hayan iya nang han-ayon ang ilang away ni Vasquez. Sa kasamtangan, si Gesta nagkampanya sa super lightweight (140 lbs).

“I want him (Gesta) to fight Miguel Vazquez as soon as possible. I talked to Vince Parra (his co-manager and trainer) and they are going to get a nutritionist to make sure he can do 135 pounds and if they can I will make that fight in October-November,” batbat ni Arum sa interbyu sa www.philboxing.com.

Gipasabot ni Parra nga mga duha na sab ka tuig katapusang nakaaway si Gesta sa lightweight hinungdan nga kinahanglan gyud nilang pangandaman og insakto ug mahisubay sa saktong pamaagi ang pagnaog og timbang.

Hinuon masaligon si Parra nga makaya ra gyud ni Gesta ang pagnaog sa iyang timbang ug dili kini mahimong isyu inig abot sa gikatakdang petsa.


VIEW COMMENTS