SECTIONS
Tuesday , May 22, 2018
BACOLOD

31 ka mga contingent sa ‘Pasigarbo sa Sugbo’

MOABOT sa 31 ka mga contingents gikan sa kalungsuran ug mga dakbayan sa lalawigan sa Sugbo ang mosalmot sa Pasigarbo sa Sugbo Festival karong tuiga.

Samtang ang Tribu Lumad Basakanon sa dakbayan sa Sugbo ang magsilbi nga guest contingent og maoy mobukas sa kalihukan pinaagi sa pagsayaw og Sinulog.

Ang Lumad Basakanon maoy three-time champion sa Aliwan Festival ug five-time champion sa Free Interpretation Category sa Sinulog Grand Parade siyudad sa Sugbo.

Alas 6:00 karong gabii gipaabot nga sugdan ang kalihukan sa parking area sa Cebu International Convention Center sa dakbayan sa Sugbo human sa street dancing sa contingents.

Si Junjet Primor, executive artistic director sa Pasigarbo sa Sugbo nagkanayon nga sa labing unang higayon mosalmot ang contingent gikan sa lungsod sa Medellin nga mopakita sa Katubhan Festival.

Ang contingent sa lungsod sa Tuburan mobalik og salmot karong tuiga pinaagi sa Tubod Festival.

Matod niya ang top twelve winners sa Pasigarbo sa miaging tuig ang subli nga mopakita sa ilang kahanas ug maayo mosayaw.

Nasayran, ang Kabkaban Festival sa Carcar City maoy grand prize winner sa Pasigarbo sa Sugbo 2011 samtang ang La Torta Festival sa lungsod sa Argao maoy first prize winner sa street dancing competition.

Karong tuiga, unom ka mga kategorya ang mahimo madag-an sa mga contingent: the ritual/showdown competition, street dancing, best decorated audio van, best in andas, best arranged festival jingle ug best festival costume.

Si Primor niingon nga moabot sa P1 milyon ang premyo sa grand prize sa ritual/showdown competition samtang P500,000 sa street dancing.

Siya nidugang ang nakalahi sa Pasigarbo sa Sugbo sa ubang mga festival mao nga dinhi gipakita sa kalungsuran ug mga siyudad sa lalawigan ang ilang kaugalingon nga identity pinagi sa ilang mga produkto, kultura, natural resources ug uban pa diin sila maila.

“Each town has its own unique, distinct identity nga ilang i-present sa Pasigarbo...Makita nimo kon unsa ka rich ang culture sa mga Cebuanos.” matod ni Primor.

Apil sa mga lungsod nga mosalmot ang San Francisco, isla sa Camotes; Alcoy, Ronda, Dumanjug, Sogod, Borbon, Badian, Tabuelan, Minglanilla, Argao, Boljoon, Sibonga, Carmen, Cordova, Liloan, Malabuyoc, Oslob, Bantayan, Moalboal, Consolacion, Alegria, Tuburan, Madridejos.

Samtang ang mga siyudad naglakip sa Mandaue, Toledo, Talisay, Carcar, Bogo, Danao ug Naga.


VIEW COMMENTS