SECTIONS
Thursday , May 24, 2018
BACOLOD

Nagsunog sa kaugalingon sa Magellan’s Cross

NANGAUKAY ang mga tawo palibot sa Basilica del Sto. Niño dihang usa ka tiguwang nga lalake nisunog sa iyang kaugalingon ginamit ang usa ka gallon nga gasolina sulod sa Magellan’s Cross kagahapon sa alas 7:20 sa buntag.

Ang biktima wa mailhi sa sinugdan, apan mga kabanay niini niila kaniya sulod sa Cebu City Medical Center (CCMC) diin siya gidala samtang naa sa kritikal nga kondisyon.

Tanghaga pa sa iyang pamilya ang rason sa gibuhat ni Zequel (tinuod nga ngan gipugngan tungod sa hangyo sa pamilya), 76, taga Lorega San Miguel, dakbayan sa Sugbo, tungod kay wa man siyay sakit, gawas lang sa pagkahalap tungod sa katiguwangon.

Ang biktima nakaangkon og 2nd ug 3rd degree burns sa halos katunga sa iyang lawas.

Si Bryan Felecilda, security sa guard sa Cebu City Hall, niingon nga nag-roving siya sayo kagahapon sa buntag.

Nakabantay siya sa insidente dihang dunay kalit nga niulbong kayo sulod sa Magellan’s Cross.

Nagdali siya sa pagsusi kay ang maong area di man unta dagkutanan sa mga kandila.

Apan sa iyang paglili sa sulod, nisugat sa iyang duha ka mga mata ang usa ka tawo nga nagdilaab sa kayo nga nagkisikisi hinungdan nga dali siyang nikuha og fire extinguisher sa Cebu City Hall.

Nibalik siya sa dapit dayon iyang gipasiritan ug napawong.

Human niini, ilang gi-cordon ang area dayon nanawag sila og mga sakop sa Emergency Unit Foundation (Eruf) kinsa maoy ningtabang sa biktima ug gidala sa CCMC.

Si Felecilda niingon nga familiar niya ang maong tawo apan wa gyud siya makaila sanglit way identification card nga nakuha gikan niini, gawas lang sa tunga sa gallon nga gasolina, botelya ug lighter.

Samtang si Marjorie Salve, 36, vendor og kandila mitug-an sa mga tigbalita nga matag semana ilang makit-an ang biktima diha sa lugar.

Matod niya nga managkot sa Sr. Sto Niño ang biktima ug kahuman modiretso og hapit sa Magellan’s Cross nga subo og panagway.

Usa usab ka manindahay niasoy nga nakakita siya sa pagbubo og gasolina sa biktima sa iyang lawas.

Nidagkot kini sa iyang kaugalingon dayon nisilaob ug nahagba.

Ang nahabiling gasolina sulod sa gallon gidakop sa kayo hinungdan nga kini niulbo.

Apan si Anne (di tinuod niyang ngan), nihimakak nga magkanunayan ang iyang amahan sa
Basilica kay siya ang kanunay mogiya niini kay halap na.

Gawas pa, di kini Katoliko ug mao ra say lahi og relihiyon kanila.

Siya niasoy nga kagahapon sa alas 7 sa buntag iya pang gihatod sa usa ka tindahan sa may dan Borromeo ang iyang amahan kay naa didto ang barkada niini.

Nahibulong na lang sila kagahapon dihang sila gipahibawo sa nahitabo sa ilang amahan.

Naglibog usab sila kon diin kini og ginalon nga gasolina ug lighter.

Si Zequel, sa pagsuwat ning taho naa sa male surgical ward sa CCMC, nakigbugno sa iyang kinabuhi tu­ngod sa grabe kaayong mga paso nga iyang naangkon.

Nanawagan si Anne sa publiko nga tabangan sila sa ilang mga galastuhan aron maluwas ang iyang amahan pinaagi sa pag-text o pagtawag sa numero 0933-4487404.


VIEW COMMENTS