SECTIONS
Monday , May 21, 2018
BACOLOD

Nasakpan sa asawa gahikog; 20-anyos miinom og hilo

BANA nga nasakpan nga may cell number sa usa ka babaye nagpakamatay pinaagi sa pagpusil sa iyang ulo atubangan sa iyang asawa pasado alas 9 sa milabayng gabii sulod sa lawak nga ilang giabangan sa sityo All Season, Cogon Pardo, dakbayan sa Sugbo.

Ang nagpakamatay giila nga si Domingo Belia, 34, usa ka installer sa usa ka auto parts.

Siya nigamit og usa ka Blackwidow 9mm pistol sa pagpakamatay.

Sa pasiuna nga imbestigasyon nga gihimo nila ni SPO4 Rey Cuyos, PO2 Nilo Aventurado ug PO1 Michael Angelo Singson sa Homicide Section nagbutyag nga nagkalalis ang biktima ug iyang asawa nga si Janet human siya nasakpan sa asawa nga may number sa usa ka babaye nga hinatag sa higala nga babaye sa biktima.

Nagduda ang asawa nga cell number kadto sa babaye nga karelasyon apan kusganon kini nga gipanghimakak sa biktima.

Wa panumbalinga sa asawa ang pamahayag sa bana, nikuha kini og armas ug dayong pusil sa iyang ulo.

Samtang sa laing hitabo, tungod sa kaguol sa 20 anyos nga babaye nga ang iyang hinigugma nga iya ra usab nga paryenti adunay kuyog nga laing babaye, siya naghikog pinaagi sa pag-inom og kape nga adunay sagol nga koskos.

Ang koskos usa ka matang sa hilo nga gamiton sa illegal nga panagat.

Si Eugelyn Bacluhan nakita-an nalang sa iyang amahan nga patay sulod sa lawak sa iyang balay sa sityo Nangka, Barangay Tungasan, isla sa Olango, dakbayan sa Lapu-Lapu.

Si Bacluhan mabdos samtang duna pa silay usa ka tuig nga anak.


VIEW COMMENTS