SECTIONS
Tuesday , June 19, 2018
BACOLOD

Comelec en banc ray makahukom: opisyal

GIPATIN-AW ni Commission on Elections Ce­­bu Provincial Election Supervisor Lionel Marco Castillano nga ang Comelec en banc ang adunay hurisdiksyon pagbasura sa certificate of candidacy sa boxing promoter nga si Rex Wakee Salud.

Si Salud ang hingpit nang nakaduso sa iyang COC sa buhatan sa Comelec sa lungsod sa Cordova kagahapon bisan sa bahad ni incumbent Mayor Adelino Sitoy nga mopasaka og reklamong contempt batok niya ug sa mga opisyal sa Comelec sa higayon nga dawaton ang COC sa boxing promoter.

Si Castillano nipasa­bot nga ministerial duty sa Comelec ang pagdawat sa tanang mga COC nga isang-at sa mga kandidato nga buot magpapili sa mosunod nga eleksiyon.

Matod niya way diskresiyon ang election officer sa Cordova nga si Arvin Maghanoy nga mobalibad sa pagdawat sa COC sama kang Salud bisan og gibasura sa korte ang petition alang sa tinguha niini nga modagan pagka mayor sa lungsod atbang ni Sitoy.

Siya niingon nga ha­ta­gan og due process ang boxing promoter diin dunggon sa ilang ulohan nga buhatan ang reklamo batok niini sa dili pa mohimo og desisyon.

“Kung imong matan-aw maski sa Law Department sa Manila kanang mo-receive para sa senador ug party list gidawat gani didto nga niangkon nga tag-iya siya sa tibuok Pilipinas,” pahayag sa maong opisyal dihang nahinabi sa mga tigbalita.

Si Sitoy nagplano nga mopasaka og tulo ka mga kaso batok ni Salud human kini nakaduso na sa iyang COC alang sa iyang tinguha nga mag-mayor sa Cordova.

Apil sa mga kaso ang cancellation sa COC, perjury ug contempt of court.

Naglaraw usab siya nga moduso og contempt batok sa election officer sa Cordova tungod sa wa pagsunod sa kamanduan sa korte nga ang boxing promoter dili usa ka rehistrado nga botante sa lungsod.


VIEW COMMENTS