SECTIONS
Saturday , May 26, 2018
BACOLOD

Davao del Sur: COCs gihatod na sa kauluhan

GIHATUD na sa Commission on Election (Comelec) sa Davao del Sur ngadto sa Manila ang mga gipangsumiter nga Certificate of Candidacy (COC) sa mga pulitiko sa lalawigan.

Si Abogada Maria Febes Barlaan, provincial election supervisor, mismo ang miadto sa kauluhan aron ihatud ang mga COC.

Nasayran nga duha ang midagan pagka-gobernador sa lalawigan, kini sila First Representative Marc Douglas Cagas ug kanhi 2nd District Representative Claude Bautista.

Duha sab ang mag-atbang pagka-bise gobernador, kini sila Simplicio Latasa ug Board member Aileen Almendras-Uy.

Samtang upat ang magsangka-pagka-Kongresista nga gilangkuban nila Vice-governor Atty. Arsenio Latasa, Board member Mercedez Cagas, Wilhemina Almendras ug ang wa’y puas sa pagdagan nga si Pablo Villaver sa Unang Distrito.

Duha lamang ang mipapili sa maong posisyon sa Ikaduhang Distrito human nagpare-elect si Representative Franklin Bautista ug giatbangan sab ni Randolph Parcasio.

Aduna’y napulo nga midagan pagka-board member sa Unang Distrito, sila mao Ronald Banac; Emmanuel Bendigo; Victoriano Cadungog; John Tracy Cagas; Salvador Dumugho; Concepcion Zeny Ferolino; Nonito Llanos III; Marvin Manos ug Ricardo Molina.

Napulo sab sa Ikaduhang Distrito mao sila si Alberto Baliota; Rogelio Baribar; Allan Colina; Ligaya Gealon; Jason John Joyce; Romeo Tan; Isabelo Masiwel; Ramar Parcasio ug Elmer Calinawan.

Tulo sab ang nagpapili pagka-mayor sa dakbayan sa Digos nga mao sila incumbent Mayor Joseph Penas, Douglas Cagas ug Emelio Lustre Jr.

Sa lungsod sa Bansalan, magsangka og balik si Mayor Edwin Reyes ug kanhi Mayor Peter Melchor Arches.

Sa lungsod sa Jose Abad Santos, subling modagan si kanhi Mayor Zander Khan atbang ni Mayor James Joyce ug ikatulo mao si Mario Guillermo.

Sa lungsod sa Sta. Cruz, si Mayor Joel Ray Lopez, subling magpapili ug duha ang iyang kaatbang nga mao si kanhi Mayor Jerome Undalok ug Arsenio Lagera.

Sa lungsod sa Malalag, si Mayor Roel Paras gi-atbangan ni kanhi Mayor Jivel Mamaril ug Deanna Magdayao.

Tulo sab ang modagan pagka-mayor sa lungsod sa Matanao, human nagpare-elect si Mayor Butch Fernandez nga gi-atbangan ni kanhi Mayor Pablito Albarccin ug Rosemarie Yuson.

Sa lungsod sa Kiblawan, mag-atbangay sila Mayor Atty. Marivic Caminero-Diamante ug kanhi Mayor Jaime Caminero.

Sa lungsod sa Malita, gi-atbangan ni Board member Princess Erum Parcasio si Mayor Benjamin Bautista Jr nga nagpasubli og pili.

Sa lungsod sa Magsaysay, one on one sab pagka-mayor sila si incumbent Mayor Jess Lumanog ug kanhi Mayor Arthur Davin.

Sa lungsod sa Sulop gi-atbangan ni Leopoldo Diones si Mayor Jose Jimmy Sagarino.

Sa lungsod sa Padada, modagan pagka-mayor ang anak sa namatay nga kanhi Mayor Antonio Razonable nga si Gladys Razonable atbang ni incumbent Mayor Pedro Caminero.

Sa lungsod sa Sarangani ang asawa sa gi-ambush nga si Mayor Jerry Cawa nga si ABC President Virginia Cawa ang nidagan apan gi-atbangan ni Marciano Lagundas.

Apan sa lungsod sa Sta. Maria, ang mag-igsuong sila si Mayor Mila Mariscal-Cabanero ug Vice-mayor Rudy Mariscal mao ang mag-atbangay.

Samtang wala’y kalaban ang mayor sa Don Marcelino sanglit bugtong nagpare-elect mao si Mayor John Jonhson.

Sa kasamtangan, di pa masuta sa Comelec kung kinsa ang mga nidagan nga nuisance candidate sa lalawigan apan gitakdang susihon kini sa ilang buhatan. (Dondon Dinoy)


VIEW COMMENTS