SECTIONS
Thursday , May 24, 2018
BACOLOD

Editoryal: Unsay buhaton sa DepEd

DAGHANG mga tinun-an sa Jaclupan National High School ang wa manungha sa miaging adlaw tungod sa ilang kahadlok sa giingong dautang mga ispiritu.

Duna ganiy maestra nga nagpadala ngadto sa komunidad ni Msgr. Frederick Kriekenbeek tungod sa kahadlok nga siya masudlan.

Posible nga dunay nasudlan og ispiritu, kana kon tinuod ang taho nga usa sa mga tinun-an milutaw sa hangin samtang gipahigayon ang exorcism. Apan dako sab kaayo ang posibilidad nga kadtong nahitabo sa uban mao na ang mass hysteria nga maoy reaction sa nahitabo sa ilang kauban.

Misamot pa ang sitwasyon kay nangahadlok ang mga magtutudlo ug wa masayod unsay pagahimuon.

Di unta kadto mograbe kon ang mga maestra gibansay sa pagtubag sa ingon niadto nga sitwasyon. Kay di man kini unang higayon nga dunay hitabo sama sa Jaclupan, kinahanglan nga mohimo na ang Dept. of Education og lakang.

Kay bisan ang simbahan mismo di man modiretso pagkalawat nga nasudlan og dautang ispiritu ang usa ka tawo. Ila pang subayon ug sutaon kon di ba physical o psychological ang hinungdan.

Busa, kinahanglan moumol sila og guidelines unsay buhaton ini nga sitwasyon, mobansay og mga magtutudlo nga tahasan sa pagbuhat niini.

Kay mag-unsa na lang ang mga bata kon ang mga maestra mas nangahadlok kay nila?


VIEW COMMENTS