SECTIONS
Friday , May 25, 2018
BACOLOD

Barrita: Rason nga di moundang og inom

NAHIMUTANG sa limbo, kanang temporaryong pundohanan sa mga kalag gikan sa impiyerno paingon sa langit, ang Sin Tax Bill sa Senado human moluwat si Senador Ralph Recto
isip chairman sa Senate ways and means committee.

Ang maong balaudnon mao unta ang mopasaka sa buhis sa mga produckto gikan sa tabako ug mga ilimnong makahubog.

Nahimangod sa Senador Recto kay wa siya paluyohi sa iyang version sa sin tax bill nga makakolekta lang og P15 bilyunes imbis P60 bilyunes.

Maayo gani wa siya maghubog-hubog.

***

Gipatawag ni Senate President Juan Ponce Enrile si Presidential Legislative Liaison Office Chief Manuel Mamba tungod sa pasangil niini nga dunay lobby money nga gipatuyok sa mga magbabalaod aron mapakgang ang pagpasar sa sin tax bill.

Matod pa ni Enrile kinahanglang probahon ni Mamba ang iyang alegasyon nga gisuburnohan ang mga magbabalaod mao nga ang sin tax bill version sa Senado layaw kaayo (watered down) kay P15 bilyunes ray makolekta imbis sa espiso nga version sa House of Representatives nga makakolektag P60 bilyunes.

Abi pa lang dunay mambad sa Kongreso.

***

Kon mosaka ang presyo sa mga sigarilyo ug sa mga ilimnong makahubog, daghan na unyang mangundang og panigarilyo ug inom.

Apan atong lakbitan kining pipila ka mga katarungan nga di ka mo-undang og inom. Ikaw na unya ang labing unang moabot sa inyong trabahoan kay wa man ka mahubog sa miaging gabii. Abtik ka ug daling mahuman ang imong trabaho busa maglingkod ka na lang nga way trabaho sa nahibiling panahon sa tingtrabaho.

Mahimong mogamay ka ug momenos imong timbang kay di ka na man magsigig sumsum og crispy pata, chicharon, sisig, gambas, lechon kawali ug uban pa samtang mag-inom ug lagmit kasuyaan ka niadtong gustong magpagamay pero niburot hinuon.

***

Malimpyo na ang imong atay ug di na magsakit ang imong buko-buko ug kalawasan mao nga wa ka nay ikareklamo. Di ka na makapasangil nga duna kay hangover, busa wa ka nay katarungan nga ipabuhat sa uban ang imong trabaho.

Hayan madaot ang imong ngipon kay softdrinks na lang ang imong imnon. Di na maglabad ang imong ulo inig ka buntag busa mohinay na ang halin sa mga pain reliever. Kuha na lang daan og life insurance kay sayo kang momata. Sagad man gud sa stroke ug heart attack mahitabo sa buntag sayo.

Di ka na mokatawa sa imong kaugalingong komedya nga kon mahubog ka hasta kapila nimo balik-balika og estorya. Di na ka kakitag date kay nihupas na ang epekto sa alcohol nga makahimong gwapa ug gwapo ni bisan kinsa.

Sa kataposan, unsa man kaha ang mahitabo sa namaligyag ilimnon, sa nanagtrabaho sa mga pabrika sa ilimnon ug sa ilang mga anak nga nag-eskuyla ug sa mamalitay og botelya?


VIEW COMMENTS