SECTIONS
Monday , May 28, 2018
BACOLOD

Bus nabangga, 7 patay

LABING minos pito ang nangamatay ug kapin sa 30 ang nangaangol dihang nabangga sa mga alas 7:30 kagabii ang Jegans Bus Liner sa usa ka balay sa blind curve sa Brgy. Don Andres Soriano (kanhi Lutopan), dakbayan sa Toledo.

Hinuon, matod sa sibyaanang dySS, di pa matino kon pila gyud ang tukmang gidaghanon tungod kay gipangdala sa tambalanan sa Carmen Copper ug Toledo District Hospital ang mga biktima.

Sa Carmen Copper, si nurse Eva Kristine niingon nga upat ang patay sa mga pasyenteng nadala sa ilang tambalanan.

Kini gilangkuban sa usa ka lalake tulo ka mga babaye, usa niini hamtong na.

Siya niingon nga mga 17 ka pasahero ang nadala nga mga pasyente sa ilang ospital.

Sa pagsuwat ning taho, gisusi pa sa kapulisan kon pila gyud ang tukmang gidaghanon sa nangamatay ug nangaangol.

Ang dapit nga nahitaboan kagabii mao usay nabanggaan sa Corominas bus niadtong Hulyo 3, 2010 diin labing minos 15 ka mga pasahero ang nangamatay.

Si Supt. Henry Biñas, hepe sa kapulisan sa dakbayan sa Toledo, nihulagway sa Jegans bus nga “napikas, wasak ang tanan” dihang giinterbyu sa Sun.Star Superbalita pinaagi sa telepuno.

Ang bus nga gipanag-iya sa pamilya ni kanhi Kong. Antonio Yapha, gikan sa dakbayan sa Sugbo padung sa lungsod sa Pinamungajan dihang nahitabo ang aksidente.

Hinuon, si Pinamungajan Mayor Geraldine Yapha, sa interbyu sa sibyaanang dySS, nipasalig nga ang ilang tabangan ang tanang mga pasahero nga nangaangol ug ang pamilya sa nangamatay.

Matod ni Biñas nga labing minos 40 ang sakay nga mga pasahero sa bus, apan iya usab nga gitataw nga ang mga tawo nga didto sa nahitaboan nibana-bana nga mga 60 kapin ang mga sakay kay duna pay nagbarog nga mga pasahero.

Siya niingon nga di kalikayan nga daghan ang mga pasahero tungod kay Sabado nga maoy ting-uli niadtong mga nanagtrabaho sa dakbayan sa Sugbo.

Ang nabangga nga bus (GXD 545) nga gimaneho ni Allan Pastedio, 40, minyo, taga Bojo, lungsod sa Aloguinsan, nagdulhog sa mao nga dapit dihang kalit lang nga nawagtangan sa brake.

Kay wa na makontrolar sa driver ang sakyanan, nabangga gyud kini.

Wa pa mahibaw-i, sa pagsuwat ning taho, kon unsay nahitabo sa driver.


VIEW COMMENTS